iklan

EDUKASAUN, HEADLINE

Governu altera estatutu karreira dosente atu garante kualidade ensinu superiór

Governu altera estatutu karreira dosente atu garante kualidade ensinu superiór

Edifísiu sentrál Univesidade Nasionál Timor-Lorosa'e. Imajen Tatoli/Francisco Sony

DILI, 01 jullu 2022 (TATOLI)—Ministru Ensinu Superiór Siénsia no Kultura, Longuinhos dos Santos, hateten, Governu halo alterasaun estatutu karreira dosente atu garante kualidade ensinu superiór no bem estar dosente.

“Dekretu-lei ne’ebé hetan aprovasaun iha Konsellu Ministru atu garante kualidade ensinu superiór. Dosente ne’ebé hanesan doutoradu ho nível B3, iha obrigasun tenke atinje ninia kréditu ho valór 600, kuandu dosente doutoradu ida ninia kréditu la atinje valór ne’e, maka nia labele foti nível B3. Bainhira dosente ne’e ninia valór kréditu ne’e atinje de’it 550 maski nia doutoramentu nia tenke tama ba nível C1+,” Ministru informa iha salaun Delta Nova., Comoro, sesta ne’e.

Notísia relevante: Governu aprova alterasaun estatutu karreira dosente universitária

Antes ne’e, iha loron kuarta (29/06), aprova projetu dekretu-lei, ne’ebé aprezenta hosi Ministru Ensinu Superiór, Siénsia no Kultura, Longuinhos dos Santos, ho objetivu halo alterasaun datoluk ba dekretu-lei númeru 7/2012, loron 15 fevereiru, ne’ebé aprova estatutu karreira dosente universitária. 

“Dekretu-lei rejime karreira ba dosente Universidade Nasionál Timor-Lorosa’e (UNTL), antes ne’e hetan ona alterasaun daruak, maibé seidauk konkretizasaun ba implementasaun estatutu karreira dosente nian hodi fó bem estar ba dosente,” nia akresenta.

Dekretu-lei sira ne’e hatuur iha númeru 3/2014 15 janeiru no dekretu-lei númeru 2/2018 24 janeiru, tanba ne’e UNTL hamosu fali proposta ida hodi submete ba MESSK hodi aprezenta ba Konsellu Ministru.

“Iha prosesu alterasaun ne’e ita hamosu intensaun rua kona-ba nível foun B3 no C1+. Nivel B3 ne’e ita sei fó ba doutoramentu no nível C1+ ita fó ba mestradu, maibé nafatin kontinua promove méritu akadémiku,” Ministru esplika.

Dosente ho grau akadémiku mestradu nível C1+ másimu bainhira valór kréditu ne’e a’as liu to’o atinje 600, maibé nafatin konsidera ho nível C1+, tanba ninia grau akadémiku ne’e mestradu tanba define ona to’o de’it C1+, maibé tenke nafatin respeitu méritu akadémiku, entaun tenke la’o tuir prosesu promosaun no progresaun.

“Ita konsege hamosu nível rua ne’e iha kategoria B no C atu fó vantajen halo alterasaun hodi hatún persentajen kréditu, tanba ita-nia dosente sira iha UNTL barak maka la funsiona ba karreira dosente, tanba ne’e ita hatún kréditu ne’e maibé ita nafatin respeitu méritu akadémiku,” nia realsa.

Dekretu-lei rejime karreira dosente UNTL hafoin hetan aprovasaun iha Konsellu Ministru,  sei aprezenta fali ba Prezidente Repúblika hodi hetan promulgasaun no publika iha Jornal Repúblika hodi bele implementa karreira ba iha vaga sira.

Jornalista  : Tomé Amado

Editora      :  Julia Chatarina

iklan
iklan

Leave a Reply

iklan
error: Content is protected !!