iklan

BOBONARO, EKONOMIA, HEADLINE, INKLUZAUN SOSIÁL, MUNISÍPIU

Governu identifika abitante rihun 50 uma ‘ladi’ak’

Governu identifika abitante rihun 50 uma ‘ladi’ak’

Vise Ministru Administrasaun Estatal, Lino de Jesus Torrezão. Imajen Tatoli/Sérgio da Cruz.

BOBONARO, 01 jullu 2022 (TATOLI) – Vise Ministru Administrasaun Estatál, Lino de Jesus Torrezão, hateten governu identifika katak populasaun hamutuk 50.000 ho kondisaun uma ne’ebé ‘ladi’ak’.

Vise Ministru Administrasaun Estatál hato’o asuntu ne’e bainhira hala’o diálogu komunitária ho komunidade suku Lontas, postu administrativu Lolotoe, munisípiu Bobonaro, liuhosi programa ‘Naroman ba Suku’ ne’ebé organiza hosi Ministériu ba Asuntu Parlamentár no Komunikasaun Sosiál (MAPKOMS).

Notísia relevante:Ekipa PNDS sei sensibiliza UKL+ iha semana oin

“Ami halo levantamentu dadus ema kbiit laek iha Timor laran tomak ne’e hamutuk 50 mill mak ninia uma leten seidauk di’ak, didin seidauk di’ak, uma balun atu monu ona, uma tali-tahan, hadak no bebak,” nia hateten iha sesta ne’e.

Kondisaun uma ne’ebé iha, Governu aprova orsamentu ho montante millaun $71 atu konstrui uma dignu ba komunidade sira iha territóriu nasionál hamutuk 4,000 no kada suku hetan uma 10.

Maibé suku Ritabou, postu administrativu Maliana, munsípiu Bobonaro no suku Makadique, munisípiu Viqueque mak hetan uma unidade 12 tanba aldeia barak-liu.

Enkuantu foin lalais ne’e governu hamosu tán programa UKL plus ho kategoria A no B hodi responde komunidade kbit laek ne’ebé governu identifika, maske seidauk implementa hotu kedas maibé oras ne’e hahú halo verifikasaun.

Nune’e Lino Torrezão husu ba autoridade munisípiu, postu administrativu sira atu koopera ho VIII Governu Konstituisionál liuhosi Programa Nasionál Dezenvolvimentu Suku (PNDS) ne’ebé halo hela prosesu verifikasaun ba benefisiáriu sira.

“Ninia rekizitu mak ne’e, ema-ne’ebé oan laiha mós labele hetan uma, rai laiha mós labele, depois ninia oan funsionáriu mós la prenxe rekizitu, entaun labele hetan, tanba ne’e presiza verifika didi’ak, ida-ne’ebé merese hetan mak hetan duni,” governante ne’e fundamenta.

Ministériu Administrasaun Estatál tranferse ona orsamentu UKL regulár faze daruak no UKL plus ba konta bankária munisípiu Bobonaro, liuhosi kategoria transferénsia públika, maibé nia parte sei orienta ekipa tékniku sira halo re-verifikasaun iha munisípiu ne’e.

“Ha’u atu hatete de’it uma 10 ne’e halo hotu ona re-verifikasaun, osan mós ami halo transferénsia ona mai iha munisípiu, maibé ha’u hateten tiha ona iha-ne’e, nai xefe suku sira balun serbisu la transparante,” nia hateten.

Xefe suku Gildapil, postu administrativu Lolotoe, munisípiu Bobonaro, Emiliano Noronha, konsidera programa UKL ne’e benefísia direita komunidade sira.

Xefe suku Gildapil, Emiliano Noronha. Imajen Tatoli/Sérgio da Cruz.

“Ha’u hanesan reprezentante komunidade Jildapíl sente kontente no agradese ba programa ne’e tanba durante ne’e ami-nia komunidade balun nia kondisaun uma la dignu, ohin loron governu konsege responde ona hodi hakma’an netik sira-nia sofrementu ne’ebé hasoru iha moris ne’e,” nia agradese.

Autoridade lokál ne’e mós promete ba oin sei koopra ho tékniku PNDS no ekipa jestaun suku, atu halo verifikasaun dadus benefisiáriu tuir rekizitu ne’ebé implementa ona iha madatalan UKL regulár no UKL plus inklui prosesu tomak to’o remata.

Notísia relevante:Vise MAE husu benefisiáriu-sira utiliza UKL ho di’ak

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!