DILI, INKLUZAUN SOSIÁL

Governu presiza proteje-promove EhD bele kontribui ba dezenvolvimentu nasionál

Governu presiza proteje-promove EhD bele kontribui ba dezenvolvimentu nasionál

Ema ho Defisiénsia hatudu talentu iha área desportu iha komemorasaun loron mundiál ba Ema ho Defisiénsia ne’ebé hala’o iha Palásiu Prezidente Nicolau Lobato. Imajen/Mídia PR.

DILI, 01 jullu 2022 (TATOLI)—Eis Diretór Asosiasaun Halibur Defisiénsia Matan Timor-Leste (AHDMTL), Gaspar Afonso, hateten Estadu no Governu presiza proteje no promove ema ho defisiénsia hodi ema hotu-hotu bele kontribui ba dezenvolvimentu nasaun ne’e nian.

“Governu presiza porteje no promove no mós dezenvolve ema ho defisiénsia sira liuhosi edukasaun inkluzivu ne’ebé ho másimu atu nune’e ema ho defisiénsia no ema lahó defisiénsia hamutuk lori nasaun ne’e ba moris di’ak iha futuru,” Gaspar hateten ba jornalista sira ihaedifísiu AHDMTL, Manleuana, Dili.

Tanba, nia dehan, to’o agora Ema ho Defisiénsia sira seidauk asesu edukasaun inkluzivu ho másimu, ho nune’e mak husu ba Governu presiza dezenvolve área edukasaun maibé edukasun ida-ne’ebé mak inkluzivu liu iha sosiedade no Timor-Leste.

“Ema ho Defisiénsia matan ne’e sensitivu tebes tanba labele asesu ba buat hotu-hotu,” nia hateten.

Tuir nia, Ema ho Deisiénsia (EhD) matan sira seidauk asesu edukasaun inkluzivu ho di’ak tanba implementasaun mak seidauk másimu, entaun tenke kria kondisaun ba Ema ho Defisiensia matan sira liu-liu fasilidade saida mak bele fasilita ema hirak ne’e.

Ema ho Defisiénsia matan sira-ne’ebé daudaun ne’e tuir hela edukasaun inkluzivu mak ensinu rekorente iha faze lima ne’e, atu kontinua ba faze neen mak to’o agora Ministériu Edukasaun Juventude no Desportu (MEJD) seidauk estabelese.

Governu iha kompromísu boot atu promove no proteje sidadaun defisiénsia hanesan hatuur ona iha artigu 21 Konstituisaun Repúblika Demokrátika Timor-Leste (RDTL) maibé atu implementa ne’e liuhosi Konsellu Ministru (KM) hasai ona rezolusaun númeru 15/2011, 18 maiu, hamosu grupu traballu multidisiplina hodi kria polítika nasionál inkluzaun, promosaun direitu ba Ema ho Defisiensia (EhD).

Eis diretór ne’e hateten, liuhosi Parlamentu Nasionál (PN) ne’ebé ho nia númeru rezoluzaun 21/2012, 3 outubru, rekomenda ba Governu atu adopta medida relativa ba Ema ho Defisi’ensia no knar Ministériu Solidariedade Sosial no Inkluzaun (MSSI) mak kontempla ona iha planu estratéjiku MSSI nian hodi fó protesaun ba sidadaun hotu inklui Ema ho Defisiensia sira.

AHDMTL eziste tinan 11 maibé seidauk iha eskritóriu

Entretantu Gaspar Afonso informa, AHDMTL eziste tinan 11 ona maibé sei enfrenta dezáfiu barak hanesan fundu no fatin ka eskritóriu AHDMTL nian ne’ebé to’o agora seidauk iha.

Tanba ne’e, biban iha komemorasaun AHDMTL ba XI ne’e husu ba membru AHDMTL atu kontinua luta hodi estuda no aprende, nune’e haluan no aumenta ema ho defisiénsia sira-nia pozisaun iha Timor-Leste no iha mundu nia matan.

Iha selebrasaun AHDMTL nia aniversáriu ba dala-XI ne’e, AHDMTL nia nia atinjimentu seidauk tuir meta tanba ema ho defisiénsia barak mak sei moris izoladu no sei marjinalizadu hela no sei iha deskriminasaun hela.

“Husu membru ne’ebé hamahan iha AHDMTL tenke aproveita opurtunidade di’ak atu estuda no estuda, aprende no aprende hodi kompete iha edukasaun,” nia dehan.

Atuál Asesor Prinsipál iha Palásiu Prezidensiál ne’e hateten, seidauk to’o meta ne’ebé AHDMTL hakarak tanba ema ho defisiénsia barak mak seidauk bele asesu ba edukasaun no maiória mak sei hetan deskriminasaun hosi sosiedade.

Nia dehan, maske AHDMTL iha rasik ona rai maibé laiha kbiit atu konstrui maske iha Planta n Kadernu Enkargu (BoQ) uma nian entrega ona ba Prezidente Repúblika hodi haree no análiza.

“Ho ida-ne’e Xefe Estadu buka meiu hodi ajuda fundu nune’e bele halo konstrusaun ba ita-nia eskritóriu ba AHDMTL nian no ami hatama proposta ba Embaixada Japaun atu bele apoiu,” nia dehan.

Tanba ne’e mak hakarak servisu hamutuk ho Prezidente Repúblika, José Ramos Horta, atu oinsá bele propoin ba Governu hodi kore ema ho defisiénsia sira hotu iha Timor-Leste hosi deskriminasaun oioin.

“Ha’u-nia paresér importante ho seriedade ba Prezidente Repúblika atu fó ba Governu tanba Prezidente Repúblika la’ós ezekutadór. Tanba hau-nia knar iha ne’ebá ne’e atu oinsá kore ema ho defisiénsia sira hosi aktu deskriminasaun oioin liu-liu maihosi uluk família depois ba komunidade, sosiedade no entidade sira hotu iha Timor-Leste,” nia dehan.

Diretór Ezekutivu Interinu AHDMTL, Gabriel Panciano de Sousa, husu ba parseiru sira atu depozita ba AHDMTL no konfiansa nafatin nune’e loron ruma bele halakon deskriminasaun ba ema ho defisiénsia iha Timor-Leste.

“Ho ne’e mak bele hasa’e konsiénsia komunidade nian no liuhosi parseiru sira-nia konfiansa ami bele aumenta ami-nia rekursu no ami hametin liután ema ho defisiénsia nia pozisaun iha  ne’ebé kaderniza Timor-Leste,” nia hateten.

Adjunta Xefe Kaza Sivil Prezidente Repúblika, Henriqueta Maria da Silva, hateten Prezidente Repúblika liuhosi Asesor Prinsipál ba Ema ho Defisiénsia, Gaspar Afonso, iha kompromisu boot hodi kontinua ko’alia ho Governu no parseiru Internasionál sira atu tau matan ba nesesidade saida de’it mak EhD presiza iha Timor-Leste.

“PR kontinua fó parasér ba Governu hodi tau osan bazea ba program Nasionál EhD nian atu bele halo sira-nia programa tuir nesesidade ne’ebé iha. Tanba EhD mós iha deritu atu goza nia moris hanesan sidadaun seluk iha Timor-Leste liuhosi edukasaun ne’ebé inkluzivu,” nia dehan.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!