DILI, 01 jullu 2022 (TATOLI)- Tribunál Distritál Díli (TDD), sesta ne’e, halo rejulgamentu ba kazu arguida eis Ministra Finansa, Emilia Pires no arguida eis Vise Ministra Saúde, Madalena Hanjam, kona-bá projetu akizasaun kama elétriku ba Hospitál Nasionál Guido Valadares (HNGV) iha 2016.
Arguida na’in rua ne’e, deskonfia komete krime partisipasaun ekonómia no negósiu ne’ebé previstu iha artigu 299 hosi Kódigu Penál Timor-Leste, iha momentu Emilia Pires assume kargu Ministra Finansa no Madalena Hanjam nu’udar Vise Ministra Saúde hodi halo akizasaun kama elétriku ba pasiente HNGV ho montante millaun $1.
Tuir ajenda iha loron 1 fulan-jullu, iha tuku 14:00 Otl, TDD rona arguida na’in-rua nia-deklarasaun kona-bá kazu ne’e, maibé Tribunál la konsege rona tanba arguida Emilia Pires la marka prezensa.
Ho razaun ne’e, Ministeriu Públiku (MP) ne’ebé reprezenta hosi Prokuradór Rogerio Viegas, husu tribunál atu notifika Arguidu Emilia Pires nian paradeiru, nune’e bele lori mai timór hodi tuir prosesu julgamentu kazu ne’e.
Tanba tuir prosesuál rejulgamentu nian tribunál tenke rona parte rua, maibé arguida Madalena Hanjam mesak mak marka prezensa, maibé arguida Emilia Pires la marka prezensa no to’o agora tribunál seidauk fiksa no identifika paradeiru Emilia Pires nian.
“Ministeriu Públiku husu tribunál atu fiksa editál ba arguida, tuir kódigu prosesu penál artigu 257 nian, se arguidu la marka presenza iha tribunál hodi tuir julgamentu iha tempu tuir mai bele reprezenta hosi nia defeza ,” Prokuradór Rogeiro Viegas, deklara iha sala julgamentu TDD, sesta ne’e.
Iha biban hanesan, Defeza eis Ministra Finansa, José Guterres deklara katak, notifikasaun ba arguidu tenke ba pesoál, maibe se notifikasaun pesoál laiha ona, bele notifika editál tuir artigu 257 kódigu prosesu penál.
“Hodi nune’e aguida nian defeza bele reprezenta arguida hodi tuir julgamentu nune’e bele aseleira prosesu julgamentu ne’e,” nia afirma.
Hafoin rona pedidu hosi parte hotu, Juís Prosesu, José Maria no Fransisca Cabral, deside hodi notifika arguida Emilia pires ho editál tuir kódigu prosesu penál artigu 257. Katak kuandu julgamentu tuir mai arguida Emilia Pires la marka prezensa iha julgamentu defeza maka sei reprezenta arguida hodi hakat ba julgamentu.
Tuir artigu 257 hosi Kódigu Prosesu Penál, sita pontu tolu importante, mak, pontu dahuluk kuandu arguidu hetan tiha Termu Identidade Rezidénsia (TIR) no labele halo notifikasaun pesoál ba nia kona-bá despasu ne’ebé marka loron ba julgamentu no detensaun atu lori nia mai audénsia inklui tenke taka editál iha morada ne’ebé nia hatudu iha TIR hodi notifika nia.
Pontu daruak, sita notifikasaun editál ne’e tenke halo loron 20, antes data foun ba julgamentu no aviza katak nia la mai karik julgamentu ne’e, nia-defensór mak sei reprezenta nian. Enkuantu pontu ikus liu katak notifikasaun editál la impede atu hasai mandadu ba detensaun ka kaptura.
Hafoin rona hotu parte hotu, tribunál deside adia julgamentu ne’e ba iha 19 setembru 2022, tuku 9:00 OTL.
Audiénsia Julgamentu prezide hosi juis koletivu José Maria, Francisca Cabral, Maria Solana, Ministériu Públiku reprezenta husi Prokuradór Rogério Viegas no arguida na’in-rua hetan asisténsia legál hosi Advogadu privadu José Guterres ho Soraya Marques.
Jornalista: Natalino Costa
Editór : Florencio Miranda Ximenes
