iklan

BOBONARO, HEADLINE, MUNISÍPIU, POLÍTIKA

MAPKOMS sei harii sentru informasaun iha Lontas

MAPKOMS sei harii sentru informasaun iha Lontas

Ministru ba Asuntu Parlamentár no Komunikasaun Sosiál (MAPKOMS), Francisco Jerónimo, hato'o hela intervensaun iha programna Naroman ba suku ne'ebe realiza iha suku Lontas. Imajen Tatoli/Sérgio da Cruz.

BOBONARO, 01 jullu 2022 (TATOLI) – Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, promete estabelese sentru informasaun iha suku Lontas, postu administrativu Lolotoe, munisípiu Bobonaro hodi promove joven sira-nia nia telenta.

Nia hato’o promesa ne’e bainhira hala’o diálogu komunitária ho komunidade suku ne’e liuhosi Programa Naroman ba  Suku, sesta ne’e.

Notísia relevante: Programa Naroman ba Suku, entre promesa no solusiona preokupasaun iha baze

“Atu hatete ba ita-boot sira katak, suku Lontas ami hili ona atu hari sentru informasaun ida iha-ne’e ba joven sira, atu organiza sentru ne’e, ami sei mai fó formasaun ba imi, oinsá atu hakerek notísia, oinsá haree imi-nia potensialidade ne’ebé mak iha, bele foti no haruka fali ba nasionál atu ema bele hatene Lontas ne’e iha ne’ebé, sira sei hasai fotografia no vídeo fa’an ba públiku katak ami Lontas mak ne’e,” governante ne’e hateten.

Governante ne’e reforsa, antes estabelese ekipa ida hosi nasionál sei tún fila-fali hasoru malu ho lideransa komunitária sira hanesan, xefe suku, xefe aldeia, veteranu no inan-aman sira inklui juventude hotu atu dezeña profile suku nian.

Nia husu ba kumunidade iha suku ne’e atu koopera ho ekipa sira nune’e prosesu hotu bele la’o ho di’ak to’o implementa programa ne’e bele fó vatajen di’ak ba jovens sira-ne’ebé iha interese atu dezenvolve kreatividade iha área mídia nian.

“Ha’u hein katak antes ha’u-nia mandatu ne’e remata, ami sei harii duni, komitmentu ami-nia ohin ami hakarak halo halo kedas, lalika rai hela, lae orsida malirin tiha fali, ne’e duni ha’u husu joven sira prepara-aan no aproveita didi’ak ba,” nia hateten.

Molok estabelese sentru informasaun ne’e sei apoia mós ekipamentu futeból nian hanesan, bola no farda atubele utiliza iha eventu sira-ne’ebe realiza iha suku-suku, postu no munisípiu.

Xefe suku Lontas, Alípio Belo, sente kontente ho inisiativa governu nian tanba hahú ona fó espasu ba komunidade sira atu aprende hodi kontribui ba dezenvolvimentu nasionál iha área informasaun.

“Ami prontu koopera ho governu, liuliu ekipa sira-ne’ebé sei mai iha suku ne’e, tanba programa ida-ne’e iha nia vantajen ba komunidade sira-ne’ebé durante ne’e susar atu hetan oportunidade ba programa governu nian, espera bele realiza lalais iha tempu tuir mai,” nia hateten.

Suku Lontas iha aldeia tolu mak hanesan, Tas-Mil, Piron no Ozo ho totál abitante na’in-989 no xefe família hamutuk 215.

Notísia relevante:CEFTEC sei submete relatóriu estabelese Institutu Formasaun Jornalista ba MAPKOMS

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!