DILI, 01 jullu 2022 (TATOLI)—Pagamentu projetu komunitária segunda faze ba reabilitasaun eskola 197 ho sala aula 651 la atinje 25% tanba Ajénsia Nasionál Dezenvolvimentu (ADN) ho ninia kompeténsia tomak halo adiantamentu ba pagamentu iha faze dahuluk.
“Ita agora enfrenta problema ida kona-ba pagamentu projetu komunitáriu ne’ebé maka Ministériu Edukasaun Juventude no Desportu (MEJD) iha ho grupu komunitáriu sira. Bainhira grupu komunitáriu sira submete pedidu pagamentu mai MEJD liuhosi diresaun hodi prepara sertifikadu pagamentu ba ADN, entidade ne’e rekomenda halo adiantamentu ba pagamentu sira ne’ebé maka halo ona iha faze dahuluk,” Diretór Nasionál Dezenvolvimentu Parque Eskolár MEJD, Hélio Lopes, hateten iha ninia knaar fatin, MEJD, Vila verde, kinta na’e.
Notísia relevante: Fiskalizasaun Komisaun G nota eskola balun implementa projetu komunitáriu la’o tarde
Nune’e, kestaun ne’e halo pagamentu segundu faze la tuir ona 25% ne’ebé define ona iha matadalan MEJD.
“Loloos grupu komunitáriu ne’ebé halo serbisu tenke hetan pagamentu segunda faze hamutuk $30.000, maibé labele ona tanba ADN hamosu redusaun adiantamentu relasiona ba pagamentu dahuluk. Ami haruka ona karta formál ida ba ADN hodi haree asuntu ne’e maibé sira responde katak tuir lei orgánika, ADN iha kompeténsia atu asegura osan Estadu hosi progresu fíziku,” nia akresenta.
Lei orgánika ADN hateten orsamentu ne’ebé atu halo pagamentu ba kada projetu tenke refleta ho ninia progresu fíziku, katak progresu fíziku 50%, entaun pagamentu mós tenke 50%, maibé tuir kompeténsia MEJD la hanesan.
“Signifika selu uluk tiha 25% maka grupu komunitáriu sira foin halo serbisu, ida-ne’e bolu adiantamentu. Tanba pratika sira ne’e regula iha matadalan ka despaxu ministeriál kona-ba lala’ok implementasaun projetu komunitáriu, katak pagamentu sira ne’e la’o tuir regra ne’ebé iha hodi garante progresu fíziku 100% pagamentu mós 100%,” nia tenik.
Entre instituisaun rua ne’e ninia sistema iha entendimentu ida la hanesan, maibé parte Diresaun Nasionál Dezenvolvimentu Parque Eskolár tenta ona haruka karta formál ba ADN hodi husu konsiderasaun, nune’e labele halo redusaun ba pagamentu.
“ADN nia resposta maka atu asegura osan Estadu. Iha semana kotuk ami halo ona reuniaun ho ADN atu haree kestaun ida atu iha opsaun balun ita bele opta hodi sai hanesan dalan ida atu bele halo pagamentu ba projetu komunitáriu sein redusaun,” Diretór dehan.
Iha parte seluk, preokupasaun jerente grupu komunitária sira katak bainhira ADN konsege hamosu ona redusaun ba pagamentu segunda faze nian, entaun sira labele halo ona serbisu, ho nune’e ninia impaktu maka projetu ne’e sei la’o tarde no la tuir ona alvu ne’ebé iha.
“Realidade loos duni, ita haree projetu sira atrazu kauza hosi pagamentu maka klima, maibé ita rekoñese faktu sira ne’e, MEJD haree ona matadalan hafoin kontinua halo diskusaun ho ADN hodi hetan solusaun ida atu parte rua bele konkorda atu pagamentu ba projetu komunitáriu ne’e tenke hakruk tomak ba lei ne’ebé iha tanba iha opsaun lubuk ida maka ita tenke opta atu labele hamosu redusaun. Enkuantu ADN hein hela parte jurídiku atu haree asuntu ne’e ho detallu hodi halo diskusaun ho parte tékniku sira hosi MEJD,” nia salienta.
Aleinde ne’e, pagamentu ba projetu komunitáriu adianta tanba presiza halo verifikasaun ba dokumentu sira.
“La signifika impedimentu sira ne’e Ministériu Edukasaun Juventude no Desportu mak halo. Ami ninia hakarak projetu komunitáriu sira ne’e la’o tuir nia tempu, maibé buat hotu la’ós MEJD mak tenke foti desizaun mesak,” Diretór ne’e klarifika.
Prosesu projetu komunitáriu MEJD tenke submete ba ADN atu nune’e bele hetan konkluzaun ba pagamentu projetu konstrusaun ida. Tanba ne’e maka presiza tempu, ho nune’e maka pagamentu daudaun ne’e hetan redusaun.
Jornalista : Tomé Amado
Editora : Julia Chatarina
