iklan

EDUKASAUN, HEADLINE

MESSK hapara atividade klase paralela UNPAZ Oé-cusse

MESSK hapara atividade klase paralela UNPAZ Oé-cusse

Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 01 jullu 2022 (TATOLI)–Ministru Ensinu Superior Siénsia no Kultura (MESSK), Longuinhos dos Santos, foti desizaun hodi hapara atividade klase paralela Universidade da Paz (UNPAZ) iha Rejiaun Administrativu Espesiál Oé-cusse Ambeno (RAEOA) tanba klase ne’e la hetan lisensa operasionál hosi ministériu.

“Kestaun la’ós ha’u mak hapara maibé lei mak haruka, ne’ebé laiha relasaun ida ho problema kréditu UNPAZ,” Ministru informa, iha salaun Delta Nova, Comoro, sesta ne’e.

Notísia relevante: MESSK inisia altera rejime estabelesimentu ensinu superiór hodi hadi’a kualidade

Tuir Ministru, nia parte halo tuir de’it saida mak hatuur iha lei, ne’ebé laiha dalan atu halo diálogu.

“Kooperasaun entre Instituisaun Ensinu Superiór Superiór Privadu (IESP) ho Governu ne’e importante tebes, bainhira ministériu bolu instituisaun sé de’it, tenke koopera atubele hadi’a buat ne’ebé ladi’ak, maibé iha instituisaun balun ladún koopera, tanba ne’e tenke foti desizaun. Ha’u fó ezemplu ida tan, ha’u taka ona klase paralela Institutu Siénsia Teknolojia (IST) iha Maliana. Ita bele imajina sira-nia biblioteka ne’e hanesan kios, departamentu medisina laiha fasilidade, estátua de’it mak iha, oinsá atu garante kualidade,” nia akresenta.

Biban ne’e, nia husu ba IESP ne’ebé de’it bainhira atu loke klase paralela tenke hetan lisensa operasionál, ne’ebé prepara ona hosi ministériu, atu nune’e bele garante kualidade.

“Dekretu-lei ne’e rasik aprova ona iha Konsellu Ministru atu regula instituisaun ne’ebé hakarak loke klase paralela tenke hetan lisensa. Ha’u aprezenta ona dekretu-lei ne’e ba Konsellu Ministru iha fulan kotuk no hetan ona aprovasaun, ne’ebé Instituisaun Ensinu Superior Privadu sira ne’ebé mak la kumpre lisensa operasionál hodi loke klase paralela arbiru de’it sei kona multa,” nia dehan.

Polítika hamosu dekretu-lei regula IESP sira atu koopera hamutuk ho ministériu hodi bele garante kualidade no dekretu-lei ne’e fó dalan atu regula prosesu graduasaun.

“Durante ne’e, prosesu graduasaun iha Instituisaun Ensinu Superiór Privadu barak mak la’o ladún di’ak tanba laiha kooperasaun di’ak ho Governu. Dokumentu no proposta graduadu ne’ebé maka universidade ka Instituisaun Superiór sira submete mai ministériu dala barak seidauk hetan aprovasaun hodi sira realiza ona graduasaun,” nia salienta.

Dekretu-lei ne’ebé vigór hateten katak dokumentu graduasaun IESP sira ne’ebé submete mai ministériu, ninia durasaun tempu fulan-ida atu fó biban ba ekipa tékniku ministériu halo verifikasaun ba dokumentu estudante sira molok graduasaun.

Kuandu ekipa tékniku sira verifika hotu no deklara katak dokumentu graduasaun hosi IESP ne’e laiha problema maka IESP ne’e bele hala’o ninia graduasaun, ne’ebé verifikasaun ne’e bazeia ba relatóriu annual hosi Instituisaun sira.

Aleinde ne’e, kauza barak akontese iha IESP sira, iha estudante balun hosi semester 1 to’o 5 la tuir aula no nia naran la rejista, maibé bainhira Instituisaun Superiór sira realiza ona programa estájiu inklui preparasaun ba graduasaun nia naran iha hotu lista.

“Kazu hanesan ne’e ita halo ona identifikasaun maibé baihira ita husu klarifikasaun, universidade ka Instituisaun Supeiór refere dehan estudante ne’e halo transferénsia hosi instituisaun seluk. Ha’u-nia ekipa tékniku sira ba halo verifikasaun iha IESP no estudante ne’e la tama iha prosesu transferénsia, ne’e kazu ida sériu no tenke buka ninia solusaun,” nia tenik.

Dekretu-lei ne’e aprezenta ona ba Prezidente Repúblika atu hetan promulgasaun no publika iha Jornál Repúblika, hafoin ekipa ministériu sei halo disaminasaun ba IESP sira hodi bele intende didi’ak ho lei ne’e, nune’e iha futuru labele mosu problema iha prosesu sira.

Jornalista  : Tomé Amado     

Editora      : Julia Chatarina

iklan
iklan

Leave a Reply

iklan
error: Content is protected !!