iklan

COVALIMA, POLÍTIKA, SAÚDE

Ministra Saúde observa Sentru Saúde Covalima afetadu ba inundasaun

Ministra Saúde observa Sentru Saúde Covalima afetadu ba inundasaun

Ministra Saúde, Odete Maria Freitas Belo, hamutuk ho nia ekipa halo observasaun ba Sentru Saúde Covalima ne’ebé afetadu ba inundasaun. Imajen Tatoli/Celestina Teles.

COVALIMA, 01 jullu 2022 (TATOLI)—Ministra Saúde, Odete Maria Freitas Belo, hamutuk ho nia ekipa halo observasaun ba Sentru Saúde Covalima ne’ebé afetadu ba inundasaun.

Inundasaun ne’e akontese tanba durante loron tolu udan boot no tama ba loron haat iha sesta (30/06) ne’e, udan hetok boot no halo bee-mota sa’e no to’o afeta mós ba sentru saúde Covalima.

“Horisehik udan boot akontese inundasaun liu-liu afeta ba ami-nia sentru saúde postu administrativu Suai ne’e bee tama to’o uma laran. Entaun, ha’u preokupa ai-moruk ho vasina ne’ebé iha armajen iha sentru saúde no ema balun bee estraga sira-nia uma,” Odete Maria Freitas Belo informa ba jornalista sira, hafoin halo observasaun ba situasaun real iha sentru saúde postu Suai, sesta ne’e.

Ho akontesimentu inundasaun ne’ebé afetadu ba sentru saúde ne’e, Governante ne’e hakarak haree diretór sira halo atuasaun ba inundasaun ne’ebé afetadu ba sentru saúde ne’e oinsá no fó impaktu ba ema ruma ka lae, tanba inundasaun la’ós afeita ba Sentru Saúde maibé komunidade balun mós afetadu ba inundasaun maske la todan

Hafoin halo observasaun, Ministra Saúde mós promete atu hadia moru ne’ebé monu maibé komunidade sira mós defisil atu entrega rai atu bele konstrui bee dalan.

“Ami sei hadi’a moru sentru saúde ne’ebé monu no komunidade mós defisil atu entrega rai, atu bele halo bee dalan no bee bele suli tuir. Ami lori kedas enjiñeiru sira iha idea atu hasa’e hodi  ateru rai no konstrui moru atu labele akontese tan inundasaun,” nia dehan.

Asuntu ne’e, nia parte ko’alia ona ho diretora servisu saúde munisípiu Covalima atu haruka relatóriu kona-ba fasilidade saúde ne’ebé hetan estragu hodi relata ba nasionál.

“Ami hein de’it diretora hamutuk ho ita-nia administradór munisípiu ho líder sira tau hamutuk idea, nune’e ministériu bele resolve,” nia hateten.

Xefe Sentru Saúde, Mateus Oliveira Mendonça, hateten inundasaun akontese afetadu ba sentru saúde hodi estraga fasilidade saúde no halo moru monu, no faslidade sira seluk ne’ebe labele deskreve ida-dak.

“Antes akontese inundasaun, ami akompaña previzaun tempu ne’ebé fó sai hosi meteorolojia, ho nune’e pesoál saúde sira halo preparasaun hodi rai ai-moruk iha fatin segura maibé balun la konsege salva tanba espasu la sufisiente,” nia hateten.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!