iklan

DILI, POLÍTIKA

Osan fundu mina-rai presiza investe iha setór produtivu garante sustentabilidade

Osan fundu mina-rai presiza investe iha setór produtivu garante sustentabilidade

Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony.

DILI, 01 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten osan fundu mina-rai presiza investe ona iha setór produtivu iha rai-laran nune’e bele iha reseita alternativu garante sustentavilidade fundu ho tempu naruk.

Notísia Relevante: Timor-Leste lakon biliaun $1,6 tanba implikasaun hosi inflasaun globál

“Tenke investe ba setór produtivu hodi nune’e to’o momentu ida ita labele depende totál ba fundu mina-rai. Se ita depende de’it fundu mina-rai, ita la investe ba setór produtivu iha rai-laran, ita-nia fundu mihis ba beibeik, depois ita investe hosi retornu investimentu fundu hanesan iha banku Amérika ba lakon hanesan ne’e, tanba laiha garantia ita hetan rendimentu hela de’it,” Prezidente Parlamentu ne’e hateten ba Agência Tatoli, hodi hatán ba kestaun Estadu TL lakon biliaun $1,6 hosi retornu investimentu fundu petrolíferu, iha Parlamentu Nasionál, sesta ne’e.

Timor-Leste laiha forsa sufisiente atu kontrola tanba investimentu sira hanesan ne’e depende ba ekonómia global, se iha resesaun ekonomia ka iha krize ekonomia ruma mundiál klaru nia afeta kualkér investimentu inklui Timor-Leste nia investimentu iha equity bons,” nia dehan.

Tan ne’e, investimentu ne’e ohin Timor-Leste bele iha retornu no aban bele lakon tanba sempre dinámiku depende ba nia ambiente.

“Entaun antisipa labele monu iha risku sira-ne’e investe loos iha setór produtivu iha rai-laran. Tanba ne’e, iha kualkér Governu ida agora esforsu, se to’o agora rezultadu seidauk iha ne’e mak ita-nia dezafiu,” nia dehan.

Tuir nia, produsaun rai-laran ai-han de’it importa mak sei barak, loloos ida-ne’e tenke iha ona sustentabilidade tanba tinan barak aprova ona Orsamentu Jerál Estadu.

“La’ós responsabilidade VIII Governu Konstitusionál de’it maibé Governu sira anteriór tenke hatudu rezultadu dezempeñu ne’e saida mak atu hadi’a ekonomia, hasa’e produtividade iha ita-nia setór produtivu sira, nune’e uitoan ka barak hasees ona dependénsia ba fundu mina-rai,” nia dehan.

Notísia Relevante: Ekonomista konsidera lakon biliaun $1,6 tanba inflasaun globál nu’udar prosesu normál

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!