COVALIMA, INKLUZAUN SOSIÁL

PNTL Covalima tulun sobu komunidade Akar-Laran nia uma ne’ebé naksobu

PNTL Covalima tulun sobu komunidade Akar-Laran nia uma ne’ebé naksobu

Komandante PNTL Munisípiu Covalima, Superintendente Basílio de Jesus orienta membru sobu uma komunidade nia uma ne’ebé naksobu tanba inundasaun iha aldeia Akar-Laran, suku Suai Loro. Imajen Tatoli/Celestina Teles.

COVALIMA, 01 jullu 2022 (TATOLI)—Komandante PNTL munisípiu Covalima, Superintendente Polisia Basílio de Jesus ho nia membru sira hamutuk ho xefe suku no xefe aldeia ajuda sobu uma komunidade monu naksobu tanba afetadu hosi inundasaun iha aldeia Akar Laran, suku Suai Loro, postu administrative Suai, munisípiu Covalima.

Notísia Relevante: Ekipa konjunta Covalima halo levantamentu dadus ba komunidade afetadu inundasaun

“Udan boot hodi hamosu inundasaun ita-nia komunidade lubuk ida mak afetadu ba inundasaun área afetadu makaas liu mak suku Suai Loro, iha aldeia Akar Laran, nune’e membru PNTL ajuda komunidade sira hodi sobu uma,” Komandante PNTL Munisípiu Covalima, Superintendente Polisia Basílio de Jesus hateten ba jornalista sira hafoin sobu komunidade nia uma iha Aldeia Akar-Laran, sesta ne’e.

Uma iha aldeia Akar-Laran, suku Suai Loro ne’ebé afetadu hosi inundasaun ne’e uma dapur rua mak monu, ho nune’e komandante ho nia membru hamutuk ho xefe suku hodi ajuda komunidade sobu uma no apoiu nesesisidade bázika ba komunidade afetadu sira.

Aleinde uma rua monu, inundasaun estragu mós natar lubuk iha aldeia Akar-Laran no animál hodi afeta ba komunidade.

“Ha’u fó atensaun ba komunidade bainhira udan nafatin, ita mos tenta atu salva sira liu-liu ferik-katuas no feto isin-rua todan sira ho mos evakua sira hosi Suai Loro, nune’e sira labele sai vitima ba inundasaun,” nia dehan.

Xefi suku Suai Loro, Martinho Mendonça reforsa, udan boot hamosu inundasaun iha aldeia Akar-Laran komunidade nia uma dapur rua mak monu ohin komandante ho nia membru ajuda sobu komunidade nia dapur ne’ebé monu naksobu tanba udan-boot no inundasaun.

“Ami-nia observasaun iha terrenu iha aldeia Akar-Laran ne’e, akontese inundasaun halo família uma-kain rua nia dapur monu no ohin komandante ho nia membru ajuda ona komunidade hodi sobu uma refere,” nia informa.

Vítima afetadu inundasaun, Maria Madalena Moniz dehan, udan boot akontese hodi hamosu inundasaun ne’e halo uma dapur monu nalsobu no la konsege salva sasán dapur nian no ai-han balun ne’ebé rai iha dapur laran.

“Inundasaun horisehik, ami-nia uma dapur mak monu tun no ami labele hasai ami-nia sasán no hahahn iha dapur laran. Nune’e, ami provizóriu família sira mak apoiu fó ami atu han,” nia informa.

Jornalista : Celestina Teles

Editór      : Cancio Ximenes

iklan
iklan

Leave a Reply

iklan
error: Content is protected !!