iklan

DILI, HEADLINE, POLÍTIKA

PR Horta hato’o karta pedidu autorizasaun ba PN atu vizita Indonézia

PR Horta hato’o karta pedidu autorizasaun ba PN atu vizita Indonézia

Prezidente Repúblika, José Ramos Horta, hasoru malu ho Prezidente Parlamentu Nasionál (PPN), Aniceto Longuinhos Guterres Lopes, iha salaun enkontru PPN, sesta (29/04). Imajen Tatoli/Francisco Sony.

DILI, 01 jullu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, informa nia-parte simu ona karta pedidu ida hosi Prezidente Repúblika (PR), José Ramos Horta, atu hala’o vizita ba Indonézia.

Prezidente Parlamentu ne’e hateten, pedidu Xefe Estadu ne’e trata asuntu Estadu nian kona-ba dezlokasaun tanba hetan konvite hosi nia ómologu Prezidente Repúblika Indonézia mak konvida, tanba Ramos Horta foin eleitu PR foun nune’e hakarak ba vizita hodi atende konvite ne’e.

“Karta horse’ik (kinta-feira) tama mai ona, tanba konstituisaun Prezidente Repúblika atu dezloka ba li’ur eseptu asuntu privadu maibé se atu halo vizita asuntu Estadu iha rai seluk tenke hetan konsentimentu (autorizasaun) hosi Parlamentu Nasionál. No, tuir karta ne’ebé iha husu atu hala’o viajén ba Indonézia mais tarde iha 18 até 24 jullu tinan ne’e,” Prezidente Parlamentu Nasionál ne’e hateten ba Agência Tatoli iha knar fatin PN, sesta ne’e.

Tuir Konstituisaun Repúblika Demokrátika Timor-Leste (KRDTL) iha artigu 95 (Kompeténsia Parlamentu Nasionál) iha númeru 3 “h” hateten katak Parlamentu Nasionál mak fó autorizasaun ba Prezidente Repúblika atu hala’o vizita Estadu nian.

Nune’e tuir rejimentu Prezidente Parlamentu sei submete pedidu ne’e iha plenária hodi fó desizaun.

“Ha’u iha obrigasaun tomak atu lori submete pedidu ne’e ba iha plenária Parlamentu no iha semana oin ita sei haree bele halo ajenda. Maibé ajenda plenária ba segunda-terseira semana oin iha hotu ona, maibé bainhira nesesáriu urjente ami bele konvoka mós plenária extraordinária hodi fó autorizasaun desizaun ruma,” nia hateten.

Lidér Segundu Órgaun Soberania ne’e hatutan, atu autoriza pedidu Xefe Estadu nian ne’e depende plenária mak deside maibé hanesan Prezidente Parlamentu tenke asegura solidariedade instituisionál.

“Ha’u labele garante autoriza pedidu ne’e ka lae, tanba Prezidente Parlamentu Nasionál votu ida de’it maibé hosi ha’u-nia parte, Prezidente Parlamentu tenke asegura solidariedade instituisionál. Maibé Deputadu ida-idak fó sira-nia desizaun votu, nune’e depende ba Parlamentu autoriza ka lae maibé ita iha esperansa boot maiória PN bele autoriza,” nia dehan.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!