iklan

EKONOMIA, HEADLINE, INTERNASIONÁL

Timor-Leste mantein pozisaun dada kadoras mai rai-laran

Timor-Leste mantein pozisaun dada kadoras mai rai-laran

Enkontru entre delegasaun Timor-Leste no Ministra Rekursu australiana, Madeleine King. Imajen/ANPM

DILI, 01 jullu 2022 (TATOLI)–Ministru Petróleu no Minerál (MPM), Víctor da Conceição Soares, hamutuk ho Autoridade Nasionál Petróleu no Minerál (ANPM) halo vizita ba Austrália iha ámbitu promove indústria minerál iha Timor-Leste ho empreza mineira australiana sira.

Biban ne’e, Ministru Víctor akompaña hosi Embaixadora Timor-Leste ba Austrália, Inês Almeida no Prezidente ANPM, Florentino Soares Ferreira, no ekipa hasoru malu ho Ministra Rekursu australiana, Madeleine King, ne’ebé durante reuniaun Timor-Leste reafirma ninian pozisaun hodi dezenvolve projetu Greater Sunrise.

“Ita haree importánsia ekonomia hodi dezenvolve Greater Sunrise iha Timor-Leste. Durante reuniaun, Timor-Leste reafirma pozisaun no kompromisu hodi dezenvolve Greater Sunrise liuhosi dada kadoras mai iha Timor-Leste,” refere nota ne’ebé Agência Tatoli asesu, sesta ne’e.

Notísia relevante: ANPM iha alvu tinan ne’e kompleta enkuadramentu legál-fiskál Greater Sunrise

Estudu viabilidade sira hotu ne’ebé mak halo hosi inísiu to’o agora, ho objetivu atu dezenvolve Greater Sunrise iha rai-laran, nune’e Timor-Leste iha asesu ba ajénsia finanseiru internasionál ne’ebé mak hakarak finansia projetu ne’e.

“Dadaun ne’e, Timor-Leste ninia empreza mina nasionál Timor GAP, E.P ne’ebé mós nu’udar membru konsórsiu, ho asaun boot tebes iha projetu Greater Sunrise asegura ona merkadu ba kompradór gas Sunrise nian iha rejiaun no globál, tanba ne’e haree katak dezenvolvimentu Greater Sunrise iha Timor-Leste nu’udar opsaun viável tebes no Timor-Leste nia pozisaun úniku mak atu avansa ho Greater Sunrise bainhira ita dezenvolve liuhosi kadoras mai Timor-Leste,” nota ne’e esplika.

Ministra Rekursu australiana ne’e nota pozisaun Governu Timor-Leste nian no enkoraja atu kontinua kolabora ho parte ne’ebé envolve.

Biban ne’e, nia mós promete atu pasa informasaun kona-ba pozisaun Timor-Leste ba entidade sira seluk.

Jornalista  : Antónia Gusmão

Editora       : Julia Chataria

iklan
iklan

Leave a Reply

iklan
error: Content is protected !!