iklan

DILI, HEADLINE, INTERNASIONÁL

Traballadora na’in-hitu iha Dubai hahú viajen mai Timor-Leste

Traballadora na’in-hitu iha Dubai hahú viajen mai Timor-Leste

Traballdora nain-lima iha Dubai hein oras de’it ona atu semo sai hosi Dubai mai Jakarta-Indonézia. Nain-rua seluk to’o ona iha Jakarta. Imajen/Espesiál.

DILI, 01 jullu 2022 (TATOLI) – Traballadóra na’in-hitu ne’ebé “terus” iha Dubai-Uni Emiradu Árabe, hahú halo viajen atu fila mai Timór,  daudaun ne’e  to’o ona iha Jakarta-Indonézia.

“Kolega na’in-rua ho inisiál A, ECdR halo ona viajen no to’o ona iha Indonézia, daudaun iha hela Embaixada Timor – Leste iha Jakarta.  Ami na’in-lima seluk agora foin iha Aeroportu Dubai hein oras tan ami semo ona ba Jakarta. Segunda semana oin ami too ona Timor – Leste,” Traballadora ho inisiál BS, informa ba Agência TATOLI via WhtasApp, sesta ne’e.

Notísia relevante:  Timoroan na’in-hitu “terus” hela iha Dubai

Prosesu traballadora na’in-hitu fila mai tanba Governu Timor-Leste halo kooperasaun ho Governu Dubai, nune’e husu empreza ne’ebé fó-serbisu atu hola tikete ba traballadora hirak ne’e fila mai Timor-Leste.

“Ami kontente loos bainhira patraun ne’e haruka ami fila ona tanba ami iha ne’e terus loos.  Ami fila no too Timor-Leste sei ba liu Polisia Siéntifica Investigasaun Kriminál (PCIC-sigla Portugés), atu hatoo keixa hodi haforsa liután evidénsia tanba ajénsia ne’ebé haruka ami mai ne’e halo terus liu ami,” BS afirma.

Timoroan lima ne’e sai hosi Dubai iha tuku 10:00 kalan, ho aviaun Emirates liuhosi rute direta mai Jakarta-Indonézia no sei hela iha Embaixada Timor-Leste iha Jakarta, no sei mai Timór iha loron segunda semana oin.

Nune’e, Traballadora ne’e agradese tebes ba Governu Timor-Leste ne’ebé esforsu maka’as tebes,  nune’e fila duni mai Timor – Leste.

“Ami mós agradese ba média hotu ne’ebé halo kobertura durante ne’e atu ema hotu hatene sira nia terus iha Dubai,” nia afirma.

Durante servisu iha Dubai, traballadora nain-hitu ne’e laiha kontratu, maibé serbisu ho baze ba surat-tahan mutin. Surat-tahan mutin ne’e sira-rekolla to’o 5.000, empreza na’in-selu traballadór hirak ne’e ho 200 dirham (ekivale 54,45 dolár Amerikanu) de’it. Se surat ne’e la to’o empreza na’in la selu.

Traballadora timoroan na’in-hitu ne’e arranka bá Dubai iha loron 19 juñu ho visa turista.

Notísia relevante:  Hetan presaun maka’as, traballadora na’in-hitu iha Dubai hakarak fila mai Timor.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!