iklan

HEADLINE, INTERNASIONÁL, POLÍTIKA, Uncategorized

Governu marka pozisaun “dada kadoras mai Timor-Leste” ba Woodside

Governu marka pozisaun “dada kadoras mai Timor-Leste” ba Woodside

Ministru Petróleu no Minerál, Víctor da Conceição Soares. Imajen Tatoli/Egas Cristovão.

DILI, 02 jullu 2022 (TATOLI)- Governu liuhosi Ministru Petróleu no Minerál, Víctor Conceição Soares ho delegasaun deklara pozisaun ba Woodside Energy katak Timor-Leste nian pozisaun, kona-bá Kampu Greater Sunrise mak tenke dezenvolve iha Timor-Leste, hanesan unika opsaun.

Iha reuniaun refere, marka prezensa Vise Prezidente na’in-rua husi Woodside Energy Andy Drummon, Vise Prezidente ba Explorasaun no Dezenvolvimentu, Grant McKenzie, Vis Prezidente ba Assess and Develop/Sunrose, sira nain rua mak reprezenta sira nian CEO, tanba CEO Woodside Energy ferias hela.

“Governu Timor-Leste hato’o ba Woodside Energy katak Timor-Leste nian pozisaun ligado ho Greater Sunrise nian dezenvolvimentu mak Kadoras mai Timor-Leste no planta LNG iha Beaço, ne’e mak unika opsaun, mesmu Timor-Leste nota iha meiu dezenvolvimentu rua mak hatuur iha tratadu,” haktuir iha komunikadu ne’ebé Agência TATOLI assesu, sábadu ne’e.

Timor-Leste mós konsiente katak negosiasaun kontinua no laiha prejudisaun ba prosesu tomak, maibé Timor-Leste mós durante ne’e nota katak empreza sira iha konsórsiu laran deklara sira nian preferensia ba dezenvolvimentu liuhosi media.

Ho nune’e, Governu Timor-Leste hanesan nain ba rekursu ho porsaun bo’ot iha mós direitu atu deklara ninian pozisaun rasik no hakarak halo klaru ba Woodside Energy katak Governo Timor-Leste nian pozisaun mak dezenvolvimentu ba Greater Sunrise tenke akontese iha Timor-Leste.

Ho nune’e, Timor-Leste hatene katak durante ne’e razaun fundamental husi empreza Woodside Energy mak viabilidade komersiál ba projetu refere. Maibé Timor-Leste nian estudu viabilidade barak ona mak hatudu katak projetu Greater Sunrise viavél no kompetitivu tebes atu dezenvolve iha Timor-Leste.

Biba ne’e, Timor-Leste mós haktuir ba Woodside Energy katak iha ajénsia finanseira internasional balun mak aproxima Timor-Leste hodi hatudu sira nian katak interese atu finansia projetu Greater Sunrise.

Tanba ne’e, la justu atu Woodside kontinua uza asunto investimentu sai hanesan razaun fundamentál ba Greater Sunrise nian viabilidade ekonomika hodi dezenvolve iha Timor-Leste.

Timor-Leste mós hato’o ba Woodside katak Estado Timor-Leste nian interesse bo’ot atu dezenvolve projetu ne’e iha Timor-Leste mak kontempla ona liuhosi partisipasaun TIMORG AP hanesan empreza estatál mina no gas Timor-Leste nian ho porsaun bo’ot iha projetu Greater Sunrise (56.56%).

Timor-Leste mós liuhusi empreza estatál halo ona esforsu hodi asegura kompradór ba gás iha merkadu rejionál no globál. Ida ne’e mós sai razaun fundamental ba Woodside atu labele uza nafatin razaun komersialidade hodi ignora dezenvolvimentu Greater Sunrise mai iha Timor-Leste.

Woodside Energy nota no entende pozisaun governo Timor-Leste nian ne’e no sei ko’alia ho nian membru Joint Ventures ka konsórsiu sira seluk konabá pozisaun refere.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!