COVALIMA, INKLUZAUN SOSIÁL

PR fó apoiu nesesidade bázika ba vítima inundasaun iha Covalima

PR fó apoiu nesesidade bázika ba vítima inundasaun iha Covalima

Prezidente Repúblika, José Ramos Horta, liuhosi Xefe kaza Sivil, Bendito Freitas, simbolikamente entrega apoiu nesesidade bázika ba komunidade afetadu dezastre naturál liuhosi autoridade Covalima. Imajen Tatoli/Celestina Teles.

COVALIMA, 03 jullu 2022 (TATOLI)–Prezidente Repúblika, José Manuel Ramos Horta, liuhosi Xefe Kaza Sivil, Bendito Freitas, domingu ne’e, hala’o vizita no fó apoiu nesesidade bázika ba vítima inundasaun iha sentru evakuasaun Eskola Sekundária Jerál Públiku Suai, Covalima.

Notísia Relevante:  MOP observa direta komunidade afetadu inundasaun iha Covalima

Xefe Kaza Sivil, Bendito Freitas, vizita no esplika ba vítima afetadu inundasaun iha sentru evakuasaun kona-ba apoiu nesesidade bázika hosi Xefe Estadu, José Ramos Horta. Imajen Tatoli/Celestina Teles.

“Prezidente delega ami mai lori apoiu inisiu ba komunidade afetadu hosi inundasaun. Tanba ne’e, ohin ekipa prezidénsia dezloka mai iha ne’e, ita simbolikamente entrega apoiu ba vítima sira,” Xefe Kaza Sivil, Bendito Freitas, hateten liuhosi nia diskursu hafoin entrega apoiu iha sentru evakuasaun iha Eskola Sekundária Públiku Suai.

Apoiu ne’ebé Xefe Estadu oferese ba vítima inundasaun iha munisípiu Covalima ne’e ajuda hosi komapañia Starking ne’ebé fó apoiu liuhosi Xefe Estadu.

Apoiu nesesidade bázika hirak ne’e mak hanesan foos saka 50 ne’ebé foos saka 20 entrega ba prizaun Suai, ba madre sira saka 25 no restu sira seluk fó ba vítima inundasaun sira-seluk iha sentru evakuasaun inklui fahe mós supermie, mina-tein Bimoli, biti no selu-seluk tan.

Xefe Estadu mós hato’o rekomendasaun atu bele tau matan ba madre sira, guarda prizonál tanba apoiu ida-ne’e hanesan simbolikmente de’it no jestu hodi tulun vítima sira.

“Ami ohin entrega ba ekipa integradu jestaun krije apoiu ne’e, ita apoiu dahuluk hosi Xefe Estadu hamutuk ho autoridade Covalima atu tulun ita-nia povu iha tempu badak no Prezidente Repúblika, José Ramos Horta, sei mai vizita vítima sira iha ne’e,” nia hateten.

Administradór munisípiu Covalima, Francisco de Andrade, informa hodi aprezenta dadus vítima inundasaun ba Xefe kaza Sivil katak totál populasaun ne’ebé afetadu  dezastre naturál hamutuk 109 ho xefe familia 35 ne’ebé evakua ona iha sentru evakuasaun sira iha Covalima.

Vítima inundasaun iha Covalima, durante ne’e Lider Nasionál Kay Rala Xanana Gusmão fó apoiu supermie kaixa 23 no Ministru Obra Públika apoiu osan fó vítima inundasaun sira.

Hafoin fó apoiu nesesidade bázika ba vítima sira, xefe kaza sivil ho ekipa hamutuk ho autoridade Covalima hanesan Administratdór Covalima, Komandante PNTL, tun ba terrenu hodi haree direta kondisaun komunidade sira-ne’ebé afeitadu inundasaun iha Aldeia  Akar-Laran, Lo’o no Loro, iha suku Suai-Loro, postu administrativu Suai.

Koordenadór Protesaun Sivil Covalima, Dinis Ferreira, informa, Komisaun Jestaun Risku Dezastre Naturál halo levantamentu dadus komunidade ne’ebé afeitadu ba inundasaun iha suku Suai Loro, Beco no Lalawa ne’ebé evakua ona ba sentru evakuasaun.

“Vítima afetadu ba inundasaun sira-ne’e ami avekau hotu ona ba iha sentru evakuasaun hanesan iha suku Suai Loro, suku Beco hosi postu administrativu Suai, suku Lalawa, postu administrativu Tilomar,” Dinis Ferreira relata ba jornalista sira iha Sentru evakuasaun salaun Eskola Sekundária Jerál Públiku.

Vítima afeitadu inundasaun sira-ne’e barak liu hosi postu administrativu Suai mak hanesan Suai Loro hamutuk uma-kain 33 ne’ebé hosi Aldeia Lo’o ne’e hamutuk uma-kain-18, aldeia akar-laran uma-kain-14, suku Beco iha aldeia Aidantuik ne’e uma-kain rua (2) no hosi postu administrativu Tilomar iha suku Lalawa, aldeia Ai-oan ne’e iha uma-kain ida (1).

Tuir dadus hosi ekipa Komisaun Dezastre Munisípiu Covalima, sira evakua ona uma kain-35 kompostu hosi feto ho idade adultu 53, mane ho idade adultu 23, labarik kiik ida (1), tinan lima mai kraik feto na’in-18 no mane na’in-12 no ema ho difisiénsia mane rua (2) no feto na’in-ida (1).

Durante halo evakusaun ekipa mós hasoru difikuldade laiha transporte no komvustivel no ai-han mós ladún sufisiente, maibé ekipa sira halo koordenasaun ho liña ministerial hodi konsege fó apoiu transporte no ai-han.

Notísia Relevante:  Ministra Saúde observa Sentru Saúde Covalima afetadu ba inundasaun

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!