Austrália iha kompromisu kontinua apoia PNTL no F-FDTL
DILI, 04 jullu 2022 (TATOLI)– Governu Austrália liuhosi Embaixadór iha Timor-Leste, Bill Costello, hateten Austrália iha kompromisu kontinua apoia dezenvolvimentu rekursu umanu no infraestrutura ba Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL).
Embaixadór Austrália hato’o prontidaun ne’e ba Primeiru Ministru,Taur Matan Ruak, durante sorumutuk iha Palásiu Governu, segunda ne’e.
“Ohin, ha’u nia enkontru ho Primeuru Ministru, hodi atualiza progresu kooperasaun entre Austrália ho Timor-Leste ne’ebé durante ne’e la’o di’ak. Ami iha komitementu hodi kontinua suporta serbisu Polisia Nasionál Timor-Leste (PNTL) 2022 to’o 2027 atubele garante serbisu di’ak liután iha komunidade nia leet,” Embaixadór Austrália ne’e hateten ba jornalista sira hafoin ramata enkontru ho Xefe Governu.
Diplomata Australianu ne’e hateten, Austrália mós kompromete kontinua apoiu iha área Defeza nian, liuliu liga ba dezenvolvimentu infraestrutura FALINTIL-Forsa Defeza Timor-Leste (F-FDTL) nian .
Governu Austrália mós kompromete apoia Governu Timor-Leste hodi dada fibra óbtika hosi nasaun refere.
“Governu Austrália mós sei fó nia kontribuisaun tomak hodi apoia ba kontrusaun Aeroportu Internasionál Nicolau Lobato.
Notísia relevante: Austrália kompromete kontinua apoia dezenvolve sistema judisiáriu iha TL
Jornalista: Natalino Costa
Editór : Florencio Miranda Ximenes
