Autoridade Bobonaro apresia GAM hamoos símbolu iha kapitál Maliana
BOBONARO,04 jullu 2022 (TATOLI) – Sekretáriu Autoridade munisípiu Bobonaro (AMB), João Fátima do Carmo, apresia Grupu Arte-Marsiál (GAM) ne’ebé hahú ona fó kontribuisaun hamoos símbolu organizasaun iha fatin públiku sira iha kapitál Maliana.
Autoridade munisípiu mós iha inisitiva atu hamoos símbolu hirak-ne’e bazea ba dekretu lei númeru 33/2018 kona-bá iijene orden públika ne’ebé bandu kualkér sidadaun halo fo’er fasilidade sira iha fatin publiku, maibé programa ne’e la konsege realiza tanba rekursu la sufisiente.
Notísia relevante:KRAM sensibiliza segunda diretiva ba GAM iha Bobonaro
“Ha’u hanesan autóridade munisípiu agradese ba KRAM, liuliu kontribuisaun hosi Grupu Arte Marsiál sira tanba iha inisiativa di’ak hamoos letra sira pinta naran organizasaun iha moru lolon sira-ne’e. Ida-ne’e mós parte atu kontribui ba estabilidade iha munisípiu ne’e,” nia informa ba Jornalista sira iha Maliana, segunda ne’e.
Adjuntu prezidente autoridade munisípiu ne’e enkoraja membru grupu arte-marsia ne’ebé eziste iha munisípiu refere atu nafatin fó kontribuisaun hodi hamoos sidade iha kapitál Maliana.
“Autoridade sempre koopera kualkér saida de’it, ne’ebé mak iha inisiativa di’ak, atu dezenvolve ita-nia munisípiu, espesialmente ba ita nia nasaun tuir enkuadramentu legál sira-ne’ebé ita-nia Governu fó-sai ona,” nia hateten.
Atividade ne’e organiza hosi Sub-Komisaun Reguladora Arte Marsiál (Sub-KRAM) Munisípiu Bobonaro iha loron 24 fulan-juñu tinan 2022, no partisipa hosi Persaudaraan Setia Hati Terate (PSHT), Ikatan Kera Sakti (IKS), Kunfu Master, Karate-Do no Taekwondo, enkuantu Kmanek Oan Rai Klaran (KORK) mak la partrisipa.
Antes ne’e Prezidente Sub-KRAM munisípiu Bobonaro, José Ramos, hateten atividade serbisu sosiál ne’e hanesan planu ne’ebé KRAM trasa ona ho objetivu atu motiva grupu arte-marsiál hotu respeita sira-nia símbolu rasik.
“Objetivu hosi limpeza ne’e atu hatudu ba públiku katak organizasaun arte marsiál ne’e la’ós de’it ba treinu, maibé atu kontribui ba governu lokál no halo sidade moos,” nia katak.
Limpeza sosiál ne’e rute hosi Jináziu Maliana, Bairru Obor, Raimeten ikus finaliza iha Jináziu oin, ho objetivu atu hamos letra arte-marsiál hanesan, 1980, 1922, 77, 46 no liafuan la edukativu sira seluk tán, ne’ebé ema deskoñesidu hakerek iha moru lolon.
Notísia relevante:KRAM kontinua fó advokasia ba GAM iha Bobonaro
“Ba oin ami sei la hetan tán ona letra sira-ne’ebé hakerek iha luron públiku. Sé ami hetan ami tenke ba buka ninia boot tenke ba apaga, kuandu la kumpre ami halo karta xamada ba sira nune’e seguransa ba buka-tuir hodi responsabiliza ba aktu sira-ne’e, kuandu lakohi nafatin ami fó sansaun ba ranting ne’e bele taka no selu multa ba estadu hosi $200 dolar to’o $2,000 dolar,” nia apela.
Jornalista : Sérgio da Cruz
Editór : Evaristo Soares Martins
