COVALIMA, JUSTISA

Komisaun Dezastre Naturál apoiu lona 36-biti 15 ba Prizaun Suai

Komisaun Dezastre Naturál apoiu lona 36-biti 15 ba Prizaun Suai

Autoridade Covalima evakua dadur na’in-118 iha prizaun Covalima ba aeroportu Komandante Kay Rala Xanana Gusmão tanba udan boot iha sesta (30/6) ne’e hamosu inundasaun ne’ebé bee-mota tama prizaun Covalima iha aldeia tabakolot, suku Debos, postu administrative Suai, Munisípiu Covalima. Imajen Tatoli/Celestina Teles.

COVALIMA, 04 jullu 2022 (TATOLI)–Diretór Prizaun Suai, Julio dias Ximenes, informa ekipa Komisaun Jestaun Risku Dezastre Naturál (KJRDN) Covalima apoiu lona-36 no biti-15 ba Prizaun Suai ne’ebé oferese hosi Prezidente Repúblika liuhosi Xefe Kaza Sivil, Bendito Freitas.

Notísia Relevante: Bee tama prizaun Covalima: dadur 118 evakua ba aeroportu Kay Rala Xanana Gusmão 

“Ohin dadeer ekipa komisaun dezastre naturál entrega ona biti-15 no lona-36 mai iha prizaun Suai, antes ne’e ha’u aprezenta ona ba Mnistru Justisa (MJ) atu responde ida-ne’e no ba ha’u-nia diretór nasionál kona-ba kulxaun be hoban no mihis ona,” Diretór Prizaun Suai ne’e hateten ba jornalista sira iha Prizaun Suai, segunda ne’e.

Tanba, nia dehan, dadur na’in-118 iha Prizaun Suai evakua ba aeroportu Suai iha kinta (30/6), iha tuku 22h30, dadur sira-ne’e husik hela aeroportu Komandante Kay Rala Xanana Gusmão reintegra fali ba estabelesimentu prizasaun Suai iha tuku 17h00 oras Timor-Leste.

“Hafoin ami reintegra dadur sira mai iha estabelesimentu Prizaun Suai, ami la’ós la hasoru difikuldade maibé difikuldade mak dadur sira laiha kulxaun tanba uza kle’ur mihis ona no balun bee hoban, nune’e hetan ona apoiu hosi ekipa komisaun dezastre naturál,” nia dehan.

Molok hetan apoiu diretór mós aprezenta uluk difikuldade ne’e ba diretór iha nasionál no Ministériu Justisa kona-ba iha prizaun laiha biti ba dadur sira maibé no agora hetan ana apoiu hosi ekipa dezastre naturál.

Maske dadur sira-ne’e reintrega mai iha estasaun Prizaun Suai maibé diretór mós kontinua koopera nafatin ho autoridade Covalima no komanante PNTL Covalima tanba iklima iha Suai kontinua udan, nune’e bainhira akontese buat ruma bele suporta Prizaun Suai.

Durante ne’e, Prizaun Suai hetan ona apoiu hosi Ministra Saúde no  Ekipa Komisaun Jestaun Risku  Dezastre Naturál entrega biti 15 no lona 36 ne’ebé hetan apoiu hosi prezidente repúblika liuhosi xefe kaza sivíl.

Tuir dadus dadur sira iha Prizaun Suai hamutuk na’in-118 no guarda prizionál hamutuk na’in-39 kompostu hosi feto na’in-haat (4) mane na’in-35.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!