DEFEZA, HEADLINE, NASIONÁL

Kuartel Jenerál F-FDTL presiza manutensaun

Kuartel Jenerál F-FDTL presiza manutensaun

Xefe Estadu Maiór F-FDTL, Donaciano do Rosário Costa Gomes "Pedro Klamar Fuik". Imajen Tatoli/Francisco Sony

DILI, 04 jullu 2022 (TATOLI)–Xefe Estadu Maiór Forsa Armada, Komodoru, Donaciano da Costa Gomes ‘Pedro Klamar Fuik’, hateten, Kuartél Jenerál FALINTIL-Forsa Defeza Timor-Leste (F-FDTL) presiza halo manutensaun tanba daudaun ne’e fasilidade barak mak ho kondisaun a’at.

“Instalasaun alojamentu atividade Militár sira atuál ne’e la sufisiente, iha nesesidade atubele halo manutensaun inkluzivamente Kuartél Jenerál. Kuartél presiza halo manutensaun profundu, liuliu hariis fatin tanba iha sistema xineza hotu, iha sistema aprovizionamentu apropriadu maibé ema ida lakohi halo manutensaun,” Komodoru Pedro Klamar Fuik, hateten iha ámbitu vizita Prezidente Repúblika, José Ramos Horta ba Kuartel Jenerál, Fatuhada, segunda ne’e.

Notísia relevante: PR Horta apresia dezenvolvimentu Forsa Armada

Ho ida-ne’e, Komandu F-FDTL konsidera hasoru difikuldade boot no husu ezekutivu sira tau importánsia urjente.

“Ida-ne’e difikuldade ida iha Kuartel, edifísiu kapas hosi li’ur maibé hosi laran se ita la halo manutensaun komesa degrada,” Komodoru preokupa.

Iha sorin seluk, Ministru Defeza, Filomeno da Paixão de Jesus, hateten, Kuartel Jenerál F-FDTL ne’e iha empreza xineza mak halo.

“Kuartel Jenerál ne’e halo hosi teknolojia Xina, ida-ne’e mak iha difikuldade. Durante ne’e loke konkursu no iha duni kompañia ida hosi Indonézia mak halo hela, maibé iha kestaun ida-rua mak nia book ladi’ak, ha’u fó ezemplu elevadór,” Ministru akresenta.

Ho preokupasaun Komandu F-FDTL nian, governante ne’e dehan, ba-oin sei buka kompañia xineza ida hodi halo manutensaun.

“Ministériu Defeza hakarak liberta F-FDTL atu sira hela mesak iha edifísiu ne’e. Tanba ami iha ona osan no daudaun prosesu ne’e iha ona Konsellu Administrasaun Fundu Infraestrutura (KAFI) atu halo fali edifísiu Ministériu Defeza ] iha Kuartel ne’e ninia kotuk. Daudaun sei hadi’ak kestaun balun no bainhira loos ona, tinan ne’e nia-rohan hahú ona konstrusaun,” nia informa.

Jornalista  : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!