DILI, 04 jullu 2022 (TATOLI)— Embaixadór Uniaun Europeia (UE) iha Timor-Leste, Andrew Jacobs, segunda ne’e, halo despedida ho Primeiru Ministru, Taur Matan Ruak, tanba konklui ona mandatu nu’udar Embaixadór iha Timor-Leste, durante tinan tolu.
“Ha’u mai informa ba Primeiru Ministru, kona-bá ha’u nia madatu ne’ebé maka ramata ona,” Embaixadór UE Andrew, hateten ba jornalista sira hafoin enkontru ho Xefe Governu, iha palasiu Governu.
Nia dehan, durante enkontru ho Xefe Governu deskute importansia atu hadi’a kooperasaun entre Uniaun Europea niaun Europeia no Timor-Leste iha futuru.
“Ami ko’alia kona- bá importansia Eniaun Europeia kontinua nafatin serbisu ho Timor-Leste iha ámbitu kombate pobreza no serbisu hamutuk ho Governu iha zona rurál hodi hamosu empregu rurál,” nia afirma.
Nune’e, Embaixadór UE ne’e kompromete atu kontinua servisu hamutuk ho Governu Timor-Leste no setór privadu Timor-Leste atu hadi’a mekanizmu investimentu liuliu investór sira hosi rai li’ur, ne’ebé atu mai investe iha Timor-Leste.
Alende ne’e, Andrew Jacobs mós relata, durante nia mandatu tinan tolu, serbisu hamutuk ho Governu Timor-Leste hodi fó asisténsia iha área direitu umanu, kombate Covid-19 no fó apoiu ba Governu liuliu ba prosesu demokratizasaun iha Timor-Leste liuhosi missaun observador Uniaun Europeia nian.
“Ha’u kontente tebes tanba durante mandatu ha’u haree Timor-Leste halo jestaun ne’ebé di’ak liga ba kombate surtu Covid-19,” nia akresenta.
Jornalista: Natalino Costa
Editór : Florencio Miranda Ximenes
