DILI, 04 jullu 2022 (TATOLI)–Ministériu Edukasaun Juventude no Desportu (MEJD), iha segundu trimestrál ne’e konsege ezekuta ona Orsamentu Jerál Estadu (OJE) 2022 alokadu hamutuk 43,97% ekivalente ho $36.580.000.
“Ha’u hakarak hateten, tuir ami-nia relatóriu ne’ebé iha, to’o ohin loron ami iha cost expenditure (osan ne’ebé uza) hamutuk 43,97%, loloos ne’e ami iha 42%, maibé haree hosi totál hotu hosi obrigasaun no kompromisu ne’e hamutuk 46,6%,” Diretór Jerál Administrasaun no Finansa, Antoninho Pires, informa iha edifísiu MEJD, Vila Verde, segunda ne’e.
Notísia relevante: MESSK ezekuta ona 30,5% OJE 2022
Osan ne’ebé gasta ba saláriu no vensimentu, kapitál menór, kapitál dezenvolvimentu no transferénsia públika.
“Iha ezekusaun segundu trimestrál ne’e depende ba relatóriu ne’ebé iha, ezekusaun boot liu maka iha saláriu vensimentu ne’ebé konsege gasta ona osan hamutuk millaun $30,2, tuir fali maka iha ezekusaun ba obrigasaun atinje mós 1,6%, ekivalente ba orsamentu millaun $1.385,” nia akresenta.
Enkuantu, ezekusaun orsamentu ba kompromisu nian iha segundu trimestrál ne’e rasik konsege ezekuta ona 2,6%, ekivalente ba osan millaun $2,177.
Jornalista : Tomé Amado
Editora : Julia Chatarina
