BAUKAU, 06 Jullu 2026 (TATOLI)–Autoridade Protesaun Sivíl (APC-sigla portugeza), Segunda ne’e, realiza formasaun ba membru hamutuk 25 kona-ba prevensaun sokuru dahuluk iha Baukau.
Komandante Operasaun APC Munisípiu Baukau, Francisco Viana Freitas, esplika atividade referida planeia husi nasionál iha-ne’ebé liuhusi formasaun bele hasa’e koñesimentu membru sira kona-ba métodu prevensaun no atuasaun durante loron-lima.
“Ita espera bele fó motivasaun no kapasita membru sira hodi halo atendimentu ba komunidade iha baze,” Komandante Operasaun APC Baukau, Francisco Freitas hateten iha Vila Antiga.
Viana relata partisipa iha formasaun referida maihusi membru sira hanesan Korpu Bombeiru, Diresaun Dezastre Naturál APC no Diresaun Serbisu Munisipál Dezastre Naturál Baukau iha-ne’ebé matéria fó direta husi Sentru Formasaun APC Nasionál.
Matéria ne’ebé hetan iha formasaun mak hanesan prevensaun kontra inséndiu, primeiru sokoru, dezastre naturál, ho objetivu atu hasa’e koñesimentu ba membru sira nune’e hala’o serbisu iha terrenu ho di’ak.
Iha fatin hanesan, Xefe Departamentu Administrasaun no Finansa APC Nasionál, Adolfo da Costa, hateten pedidu formasaun ne’e hato’o husi munisípiu kona-ba jestaun risku dezastre, primeira intervensaun kontra inséndiu no primeira sokuru nu’udár parte kapasitasaun ba membru bainhira mosu dezastre naturál iha Baukau.
“Ami sei hato’o matéria kambate inséndiu no primeiru sokuru, enkuantu seluk kona-ba redusaun jestaun risku dezastre,” Adolfo da Costa hateten.
Jornalista: Natalino Belo
Editór: Xisto Freitas da Piedade
