iklan

DILI, POLÍTIKA

Membru PN husu Governu tau atensaun vítima dezástre naturál territótoiu nasionál

Membru PN husu Governu tau atensaun vítima dezástre naturál territótoiu nasionál

Komunidade Beaço afetadu inundasaun lalin sasán uma-laran ba fatin mahon, kinta (30/06). Imajen/Espesiál

DILI, 04 jullu 2022 (TATOLI)–Membru Parlamentu Nasionál, Deputadu bankada CNRT, Patrocínio Fernandes, husu Governu liuhosi ministéiru relevante atu tau atensaun ba vítima dezástre naturál iha territótiu nasionál liu-liu iha munisípiu Covalima, Manufahi, Lospalos ho Viqueque.

Notisia Relevante: Ponte Beaço kotu difikulta movimentu transpote públiku

“Ita hatene katak iha loron hirak liuba udan makaas kuaze tama hosi Suai to’o Viqueque, iha parte Betano Alas nian sofre inundasaun makaas loos. Populasaun barak hela iha bee laran tanba ne’e hakarak husu Governu tau atensaun didi’ak ba ida ne’e. Liu-liu estrada iha Betano tama to’o Welaluhu sira-ne’e estrada laran bee de’it difikulta tiha konetividade populasaun iha ne’eba, motor ba-mai mós hulan de’it.Nune’e. importante parte ezekutivu atu hola medida urjente,” Deputadu Patrocínio levanta iha reuniaun plenária, segunda ne’e.

Iha fatin hanesan, Vise Prezidente PN, Luis Roberto, husu parte Institutu Jestaun Ekipamentu (IJE), Institutu Públiku (IGE, I.P, sigla portugés) atu hola intevernsaun ba ponte Beaço, Viqueque ne’ebé kotu.

“Udan boot ne’ebé mak akontese liu-liu iha munisípiu Viqueque iha loron 28 juñu estraga bee tama ita-nia komunidade sira-nia uma, tanba ne’e presiza intervensaun Governu oinsá ajuda nafatin. Liuliu ponte ne’ebé mak iha Beaço ne’ebé ligasaun ho Watulari ho Watucarbau kotu, halo oinsá normaliza tiha ponte, nune’e atividade komunidade la’o di’ak fila-fali hodi sira bele asesu buat hotu hanesan merkadu no eskola,” nia dehan.

Deputadu Partidu Demokrátika (PD), Mariano Assanami Sabino, hateten tenke tau atensaun ba inundasaun ne’ebé mosu iha munisípiu Baucau iha parte Quelicai ne’ebé rezulta eskola balun ameasadu no iha Suai Loro komunidade barak afeta inundasaun.

Enkuantu, iha sesaun plenária ne’e, Deputada hosi Bankada KHUNTO, Olinda Guterres, levanta preokupasaun kona-ba ofisina sira iha kapitál Dili ne’ebé la organiza ho didi’ak tanba tuir observasaun ne’ebé iha ofisina balun fakar arbiru de’it oli fo’er la armazena ho didi’ak iha fatin.

“Ha’u haree ofisina iha Dili laran barak hosi Comoro ba to’o Bekora, oli fakar bara-barak loos bele afeta ba ema-nia moris. Ne’ebé, hanoin ministéiru kompetente área ne’e presiza buka fatin propriu ba sira-ne’ebé loké ofisina karreta, motor nian,” nia sujere.

Aleinde presiza kontrola hosi parte relevante hodi haree kestaun ne’e tanba ida-ne’e hatudu imajen ladun di’ak hanesan kapitál nasaun nian, tanba bainhira ema estranjeiru sira vizita Timor-Leste ne’e fó imajen ladi’ak.

Deputadu UDT, Francisco Carlos, hateten iha tempu naruk defente povu nia moris ida-ne’ebé dignu maibé tratamentu iha ospitál balun sei iha diskriminasaun ba deputadu sira-ne’ebé iha regalias balun moras ba halo tratamentu iha rai-li’ur, maibé povu iha ne’e tratamentu saúde ba sira limitadu.

Aleinde ne’e, povu baibain sira sira mós kompra medikamentu oinsá mak bankada UDT nia hanoin tratamentu segundu órgaun soberania haat hala’o de’it iha Ospitál Nasionál Guido Valedares (HNGV), tanba tinan ba tinan hodi osan millaun dolár mak sai ba rai-li’ur hodi halo tratamentu.

“Ita reprezentante povu, se ita husik nafatin situasaun ne’e ba oin nafaitn signifika ita mak konsiente atu hadi’a kualidade atendimentu saúde ba ita-nia povu rasik,” nia sujere.

Hatán prekoupasaun hosi membru PN nian, Governu liu hosi Ministru ba Asuntu Parlamentár no Komunikasaun Sosiál (MAPKOMS), Farncisco Martins da Costa Pereira Jerónimo, hateten relasiona ho situasaun inundasaun hanesan iha parte kosta súl, Governu fó ona atensaun ba iha ne’eba no moviliza ona materiál pezadu liu-liu IGE hodi atende urjente oinsá atu fó solusaun di’ak ba ita-nia komunidade.

“Tanba de’it problema mundansa klimátika ne’ebé akontese halo, ohin loron iha fulan juñu nia laran udan bo’ot hanesan iha kosta súl halo ita-nia komunidade barak mak sofre ba inundasaun no Governu fó ona atensaun liuhosi Bombeiru, IGE ba iha ne’eba fó asisténsia ne’ebé mobiliza mós ita-nia xefe suku, xefe aldeia, prezidente autoridade munisípiu Suai no Viqueque sira hotu tun hodi haree situasaun ida-ne’e,” nia dehan.

Nia hatán kona-ba, preokupasuan seluk deputadu sira nian sei hato’o ba ministéiru kompetente hodi haree.

Notisia Relevante: Dadús provizóriu: uma 170 iha área Beaço afetadu inundasaun

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!