Top

PPN parabeniza KHUNTO kompleta ezisténsia tinan XI

Prezidente Parlamentu Nasional, Aniceto Guterres. Imajen Tatoli/Antonio Goncalves.

DILI, 04 jullu 2022 (TATOLI)—Prezidente Parlamentu Nasionál (PPN), Aniceto Longuinhos Guterres Lopes, lori PN nia naran parabeniza partidu Kmanek Haburas Unidade Nasionál Timor-oan (KHUNTO) kompleta nia ezisténsia tinan XI (04 jullu 2011-04 jullu 2022).

“Ha’u lori Parlamentu Nasionál nia naran hato’o parabéns ba partidu KHUNTO, Prezidente Partidu no Konselleiru Partidu ho estrutura tomak,” Prezidente Parlamentu ne’e hato’o votu parabéns iha reuniaun plenária, segunda ne’e.

Xefe Bankada KHYNTOo iha Parlamentu Nasionál, Olinda Guterres, hato’o mós parabéns ba militante no simpatizante partidu KHUNTO iha territóriu nasionál.

“Loron ohin 04 jullu 2022 partidu halo aniversáriu ba dala-XI ne’ebé ita-nia partidu eziste iha nasaun foun ida-ne’e. Husu ba militante no simpatizante tomak atu bele fó fuan ida atu dehan rai ida-ne’e presiza ema ua’in nia esforsu atu dezenvolve liután iha rai ida-ne’e,” nia dehan.

Nia parabeniza Prezidente Partidu KHUNTO, Armanda Berta dos Santos no Konselleiru Másimu Partidu, José dos Santos Naimori Bukar, iha loron aniversáriu ne’e.

“Parabens ba Konselleiru ne’ebé sempre fó motivasaun ba ami nia prezidente ba partidu KHUNTO ne’ebé la’o tinan 11 ona sei la’o maske ho dezáfiu sira maibé nafatin la’o ba oin,” nia hateten.

Vise Prezidente Parlamentu Nasionál, Luis Roberto, hateten partidu ne’e harii hosi povu ai-leba oan ne’ebé hakarak tane nia emar, lisan no rain.

“Aniversáriu partidu KHUNTO ba dala-XI ne’ebé partidu ne’e eziste iha Timor-Leste iha 04 jullu 2011, ohin 04 jullu 2022, partidu ida-ne’e harii mai hosi povu ai-leba oan ne’ebé hakarak tane nia emar no lisan, maske partidu ne’e harii iha situasaun defisíl nia laran hosi jerasaun foun hodi kontribui ba dezenvolvimentu,” nia dehan. 

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!