OÉ-CUSSE, 04 jullu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), tinan ne’e reativa Kopa Zona Ekonómia Sosiál Merkadu (ZEESM) atu promove talentu foinsa’e feto no mane iha rejiaun ne’e.
“Tinan ne’e ita realiza fali Kopa ZEESM, ne’e orientasaun hosi Autoridade RAEOA atu implementa fali programa uluk ita hahú maibé depois paradu tanba COVID-19 no buat seluk,” Prezidente Komisaun Organizadora, atuál Xefe Edukasaun, Daniel Mauno, ko’alia iha Oé-Cusse, segunda ne’e.
Nia informa, kona-bá mekanizmu implementasaun, daudaun instala ona komisaun organizadora ne’ebé lidera hosi Diresaun Rejionál Edukasaun ho nia membru sira mai hosi instituisaun hotu iha Oé-Cusse.
Nune’e neste mumentu komisaun organizadóra halo ona komunikasaun ba públiku, no kada klubu mai rejista ona iha Sentru Juventude Desportu Oé-Cusse (SJRO), ba modalidade desportu tolu, futeból salaun mane hamutuk klubu 16 no feto lima, voleiból mane 21 no feto 18 nomoos futeból hamutuk klubu 31.
“Objetivu hosi Kopa ne’e atu promove talentu desportiva ba joven sira feto no mane, tanba eventu ne’e sei realiza kontinuasaun kada tinan, tanba eventu ne’e hahú iha 2014 to’o 2018 para, entaun tinan ne’e autoridade hakarak kontinua fali atu anima joven sira iha rejiaun ne’e,” nia katak.
Xefe edukasaun RAEOA ne’e fundamenta, kaléndariu implementasaun sei realiza iha fulan-jullu ne’e, tanba rejistrasaun konklui ona, hein de’it enkontru tékniku atu fó-sai regulamentu kada modalidade nune’e bele sai hanesan dezisaun konjunta, nune’e kada modalidade realiza eventu jogu ne’e tuir desizaun ne’ebé estabelese ona iha enkontru tékniku.
Entretantu, totál orsamentu ne’ebé aloka ba Kopa ZEESM atu realiza desportu ba modalidade tolu ne’e hamutuk rihun $35 no fatin sei realiza iha sub-rejiaun Pante Makasar.
Jornalista : Abílio Elo Nini
Editór : Evaristo Soares Martins
