Timoroan na’in-hitu “terus” iha Dubai to’o ona Jakarta
DILI, 04 jullu 2022 (TATOLI)— Vise Ministru Negósiu Estranjeiru no Kooperasaun (MNEK), Julião da Silva, segunda ne’e, hasoru malu ho Primeiru Ministru, Taur Matan Ruak, hodi informa traballadora timoroan na’in-hitu ne’ebé durante enfrenta problema iha Dubai (Abu-Dabi), Uni Emiradu Árabe, daudaun estadia hela iha Embaixada Timor-Leste iha Jakarta-Indonézia.
“Ohin, Ha’u mai atualiza ba Primeiru Ministru kona-ba ita nia traballadora timoroan na’in-hitu, ne’ebé durante terus hela iha Dubai, agora to’o ona iha Jakarta no sei hela iha ita nia Embaixada iha Jakarta, ne’ebé Governu haree hela, oinsá halo kalkulasaun orsamentu atu lori sira fila mai,” Vise Ministru hateteb ba Jornalista-sira iha Palasiu Governu Dili, segunda ne’e.
Notísia relevante: Traballadora na’in-hitu iha Dubai hahú viajen mai Timor-Leste
Timoroan na’in-hitu ne’e konsege fila tanba servisu diplomata nian másimu tebes, halo kooperasaun ho INTERPOL iha Uni Emiradu Árabe.
Nune’e, nia dehan iha kalkulasaun atu repatria Timoroan na’in-hitu presiza orsamentu $10,000, tanba ne’e hasoru malu ho Primeiru Ministru atu fó autorizasaun. Tuir planu Governu Timor-Leste sei repatria Timoroan hirak ne’e iha semana oin.
“Agora MNEK osan laiha atu sosa sira nia billete hodi fila mai, tuir kalkulasaun ita gasta rihun-$10,000 mak lori sira fila. Imajina $10,000 ne’e, ita reabilita eskola karik bele iha mudansa, reabilita klínika karik mós iha mudans. Maibé tenke gasta de’it ba ema na’in-hitu, ne’ebé koordena ona ho Primeiru Ministru atu hetan autorizasaun ruma,” nia dehan.
Timoroan na’in-13 hasoru difikuldade iha Alemaña
Alende ne’e, Vise MNEK, mós informa ba Xefe Governu kona-bá problema ne’ebé Timoroan na’in-13 atu ba buka serbisu iha Alemaña, maibé hetan difikuldade.
“Ita hato’o mós ba Primeiru Ministru kona-bá ita nia Timoroan na’in-13, ne’ebé antes ne’e bá Portugál atu servisu, maibé mosu tiha fali iha Alemaña no hetan problema. Nune’e sira (Timoroan) hirak ne’e informa ona ba ita nia Embaixada iha Bruxelas- Holandés, atu trata no repatria mai Timor-Leste,” nia afirma.
Notísia relevante: Timoroan na’in-hitu “terus” hela iha Dubai
Nune’e, Traballadór na’in-20 resin iha Malázia mós hasoru difikuldade hanesan ne’ebé hakarak mós fila mai Timor-Leste.
“Ita haree hela no kordena ho Primeiru Ministru atu buka solusaun,” nia afirma.
Nia afirma, bainhira lori fila Timoroan hirak ne’e la prezudika ba prosesu justisa tanba Governu nafatin buka informasaun hodi prosesa Agência ne’ebé laiha responsabilidade haruka Timoroan hirak ne’e.
“Sira fila ona Governu kontinua koopera ho parte seguransa no parte Justisa atu halo investigasaun kle’an no buka tuir Agência ne’e se, mak durante ne’e fasilita Timoroan sira ne’e bá, maibé ne’e Ministeriu Públiku nia servisu,” katak nia.
Governu hetan ona informasaun kona-ba Agência ne’ebé haruka Timoroan sira ba servisu iha Malázia, Abu-Dhabi no Alemaña.
“MNEK ho Primeiru Ministru ko’alia ona ba futuru opsaun rua mak sei aplika ba sira, dahuluk, bainhira sai ba li’ur buka servisu mak hetan problema nia mak selu rasik nia-an hodi fila mai Timor-Leste, daruak, agência ilegál sira ne’e mak responsabiliza, tanba sira ba laiha rekonesimentu hosi Estadu, maibé Estadu nafatin fasilita de’it oinsá mak sira bele ho seguru,maibé sira rasik mak esforsu an hodi fila,” nia afirma.
Notísia relevante: Hetan presaun maka’as, traballadora na’in-hitu iha Dubai hakarak fila mai Timór
Jornalista: Hortencio Sanchez
Editór: Florencio Miranda Ximenes
