Udan boot estraga komunidade suku Matai uma-kain lima nia to’os
COVALIMA, 04 jullu 2022 (TATOLI)–Xefi suku Matai, João Gusmão. informa impaktu hosi udan boot iha Covalima hamosou inundasaun ne’ebé estraga komunidade uma-kain lima nia to’os.
Notísia Relevante: PR fó apoiu nesesidade bázika ba vítima inundasaun iha Covalima
“Impaktu hosi udan boot iha Covalima, afeta mós ba komunidade hodi estraga komunidade uma-kain lima nia to’os no bee sobu fondasi hosi uma kain-ida (1),” Xefe Suku Matai, João Gusmão, informa ba Agência Tatoli, iha suku Matai, segunda ne’e.
Nune’e mós, udan boot kuaze semana ida no iha sesta 01/7) hamonu ai-riin eletrisidade tolu monu iha dalan públiku hodi difikulta movimentu transporte públiku hosi suku Matai, postu administrasaun Maucatar ba iha suku Debos, postu administrative Suai.
“Ai-riin eletrisidade no fiu metan monu tanba impaktu hosi udan boot hodi halo rai mamar. Ita mai haree ai-riin eletrisidade no fiu monu fó impaktu ba ha’u-nia movimenta transporte públiku tanba ai-riin eletrisidade taka dalan entaun komunidade sira la’o ain de’it,” nia dehan.
Maske halo ona instalasaun eletrisidade ba komunidade iha suku Matai ne’ebé seidauk funsiona maibé ho ai-riin eletrisidade no fiu monu ne’e fó impaktu movimentu transporte públiku.
Tanba ne’e, komunidade hosi suku Matai atu mai suku Debos liuhosi dalan alterantiva mak liuhosi aldeia Lohorai hodi mosu fali iha suku Camanasa, postu administrative Suai.
Kona-ba problema ne’e xefi suku mós kontaktu ona ba Eletrisidade Timor-Leste Empreza públika (EDTL, E,P) maibé seidauk iha resposta.
Tuir dadus, suku Matai iha aldeia sira hanesan aldeia Kunain, Matai, Quiar, Loho-rai ho nia populasaun hamutuk 3921 ne’ebé kompostu hosi mane na’in-1759, feto na’in-1862 ho xefe família hamutuk 896.
Jornalista : Celestina Teles
Editór : Cancio Ximenes
