iklan

EDUKASAUN, HEADLINE, MUNISÍPIU, OÉ-CUSSE (RAEOA)

UNPAZ RAEOA kontinua hala’o klase paralela

UNPAZ RAEOA kontinua hala’o klase paralela

Koordenadór klase paralelu iha UNPAZ Oé-Cusse, Januário Kolo. Imajen Tatoli/Abílio Elo Nini.

OÉ-CUSSE, 04 jullu 2022 (TATOLI) – Atividade aprendizajen ba klase paralela Universidade da Pas (UNPAZ) iha Rejiaun Administrativa Espesiál Oé-Cusse Ambeno (RAEOA) kontinua hein karta lisensa operasionál hosi Ministériu Ensinu Superiór, Siénsia no Kultura (MESSK).

Koordenadór Administrasaun UNPAZ RAEOA, Januário Kolo, esplika, desizaun MESSK atu hapara eskola paralelu UNPAZ Oé-Cusse, daudaun ne’a konfirma ona ho sentrál hodi trata kona-bá prosesu administrasaun nian.

“Tuir loloos hanesan ministériu ida tenke buka solusaun la’ós atu foti desizaun urjente atu hamate fali atividade edukasaun nian, tán ne’e maka ami hanesan responsável klase paralelu hato’o ona ba iha parte nasionál, atu kontinua trata dokumentu nune’e bele prenxe hodi kontinua reativa, tanba prosesu trata dokumentu la’o ona antes maibé atraza uitoan,” nia ko’alia iha Oé-Cusse, segunda ne’e.

Nia informa, maske desizaun hosi ministériu atu hapara, maibé prosesu aprendizajen kontinua la’o hodi hein kompleta dokumentu ba lisensa operasionál nian, tanba estudante labele sai vítima iha sira-nia estudu rasik, tanba daudaun ne’e atu tama ona semestre daruak nian.

Nia informa, totál estudante ne’ebé ativa iha klase paralela iha UNPAZ RAEOA hamutuk 173, komposta hosi fakuldade neen, hanesan fakuldade ekonomia, direitu, CSH, saúde públika, téknika enjeñaria no téknika agríkola, nune’e mós ho dosente lokál hamutuk na’in-sia maioria dosente mai hosi sentrál nasionál mak fasilita iha Oé-Cusse.

Entretantu, abertura ba prosesu aprendizajen iha Oé-Cusse hahú iha janeiru 2022, maibé inísiu jullu ne’e, Governu liuhosi Ministériu Ensinu Superiór Siénsia no Kultura (MESSK) foti desizaun hodi hapara tanba konsidera klasse paralelu ne’e la hetan lisensa operasionál hosi ministériu.

Antes ne’e Ministru Longuinhos dos Santos, informa, kestaun la’o nia mak hapara maibé lei mak haruka, ne’ebé laiha relasaun ida ho problema kréditu UNPAZ nian.

Notísia relevante:http://www.tatoli.tl/2022/07/01/messk-hapara-atividade-klase-paralela-unpaz-oe-cusse/

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!