DILI, 04 jullu 2022 (TATOLI)—Reitór Universidade da Paz (UNPAZ), Adolmando Amaral, hateten, parte universidade sei kompleta rekezitu atu hetan lisensa operasionál ba klase paralela.
Kestaun ne’e relasiona ho antes ne’e, Ministru Ensinu Superior Siénsia no Kultura (MESSK), Longuinhos dos Santos, foti desizaun hodi hapara atividade klase paralela UNPAZ iha Rejiaun Administrativu Espesiál Oé-cusse Ambeno (RAEOA) tanba klase ne’e la hetan lisensa operasionál hosi ministériu.
“Ha’u-nia hanoin UNPAZ sei la taka, karik iha rekizitu ruma mak ami tenke prienxe, ami sei prienxe. Agora ami prepara hela kondisaun ruma atubele hetan lisensa operasionál tanba UNPAZ hahú halo ona kontratu arrendamentu ho Dioseze no komesa halo investimentu,” Reitór UNPAZ hateten iha ninia knaar fatin, Osindo 1 Manleuana, segunda ne’e.
Notísia relevante: UNPAZ RAEOA kontinua hala’o klase paralela
Tuir Reitór, kampus ramu UNPAZ iha Oé-cusse loke tinan-rua ona maibé daudaun lei ne’ebé MESSK aprezenta foin aprova iha Konsellu Ministru, hafoin sei haruka ba Prezidente Repúblika atu promulga no sei publika mós iha Jornál Repúblika.
“Lei ne’e sei vale ba oin la’ós filafali ba kotuk. Lei ne’ebé ita prodús atu asegura ita hotu nia interese, ita labele uza fali ita-nia poder atu halo fali limitasaun no fó fali presaun ba instituisaun ida. Pozisaun universidade sei la taka kampus ramu iha Oé-cusse,” nia akresenta.
Nia dehan, daudaun UNPAZ iha de’it ramu iha Oé-cusse no Covalima, signifika saida de’it maka akontese iha kampus sentrál, hanesan mós saida maka akontese iha kampus ramu.
“UNPAZ halo investimentu sériu iha kondisaun mínimu, iha sala aprendizajen biblioteka laboratóriu inklui rekursu sira atu apoiu prosesu aprendizajen iha kampus ramu, ne’ebé kampus ramu rua loke daudaun ne’e iha estudante besik 300 mak rejista ona no agora estudante sira tama ona ba semestre tolu,” nia tenik.
Aleinde ne’e, universidade privada ne’e iha ona rai, fatin no estudante, nune’e ba oin sei kompleta tan laboratóriu no biblioteka.
“Ami daudaun iha biblioteka online atu estudante sira bele asesu livru saida de’it, ami la presiza tau biblioteka fíziku. Ami servisu hamutuk ho Telkom Universidade Indonézia ba biblioteka online. Ami-nia estudante sira hakarak asesu iha website UNPAZ,” nia tenik.
Jornalista : Tomé Amado
Editora : Julia Chatarina
