iklan

DILI, HEADLINE, SEGURANSA

UPF detein sidadaun na’in-rua hatama mina-rai no sigarru ilegál iha fronteira

UPF detein sidadaun na’in-rua hatama mina-rai no sigarru ilegál iha fronteira

Membru UPF liuhosi Kompañia Alfa, hamutuk ho F-FDTL halo operasaun la'o-ain iha área Maliana, Munisipiu Bobonaro ne’ebé fronteira besik kedas Indonézia. Imajen/media MI

DILI, 04 jullu 2022 (TATOLI)— Polísia Nasionál Timor-Leste (PNTL), liuhusi Unidade Patrullamentu Fronteira (UPF), Postu Tilomar halo vizilánsia no kontrolu iha área fronteira, konsege kaptura sidadaun Timoroan mane ho naran inisial FN no feto EM tanba hatama ilegál hosi área fronteira Wetaba, Suku Beseuk, Postu Administrativu Tilomar, Munisipiu Covalima.

“Atu informa katak horisehik, (03/07), Ita halo apreensaun ba karreta Nissan ida ho númeru matríkula A.26624 no asegura sidadaun timor oan mane ida ho naran FN (27), ne’ebé hatama ilegál minarai masa haat, hamutuk  litru 175 inklui tara ba manu futu hamutuk jogu ida,”  Komandante UPF Euclides Belo informa liuhosi nota ne’ebé Agência TATOLI asesu, segunda ne’e.

Aleinde ne’e, Membru UPF mós asegura sidadaun feto ida ho naran EM (28) ne’ebé hatama sigarru marka Arrow Black slop 200.

Daudaun UPF entrega ona suspeitu sira ho evidénsia hotu ba komandu Polisia Nasionál Timor – Leste munisípiu Covalima hodi halo prosesu investigasaun.

Membru UPF liuhosi Kompañia Alfa, hamutuk ho F-FDTL detein no halo apreensaun ba ema no karreta iha área Maliana, Munisipiu Bobonaro ne’ebé fronteira besik kedas Indonézia. Imajen/media MI

Alende ne’e, UPF liuhosi Kompañia Alfa, hamutuk ho F-FDTL halo patrulla lao-ain konsege deteta kareta rua halo transaksaun ilegál iha Maliana, Munisipiu Bobonaro ne’ebé fronteira besik kedas Indonézia.

“Loos duni ita nia membru Servisu Sekreta hamutuk ho F-FDTL halo vizilánsia no identifika transaksaun ilegál iha área Nunura no halo kedas apreensaun ba karreta rua ho marka Avanza no Carry hamutuk ho evidénsia sira mak hanesan, gazoel lintru 35, masa hamutuk 25, sigarru marka Armour Black kaixa 4 (kartolina 320, hamutuk 3200 kaixa) maka ita prende,” nia afirma.

Nia dehan bazeia ba informasaun ne’ebe rekolla katak sasan hirak ne’e lori tama hosi fronteira Indonezia nian.

“Oras ne’e daudaun ita entrega ona sidadaun sira hamutuk ho evidensia ba Komandu PNTL Munisípiu Bobonaro hodi kontinua ba prosesu investigasaun no sei prosesa tuir lei ne’ebé vigor iha ita nia nasaun,” nia afirma

Jornalista: Hortencio Sanchez

Editór      :   Florencio Miranda Ximenes

iklan
iklan

Leave a Reply

iklan
error: Content is protected !!