DILI, 05 jullu 2022 (TATOLI)—Diretór Ezekutivu Interinu Asosiasaun Halibur Defesiénsia Matan Timor-Leste (AHDMTL), Gabriel Ponciano de Sousa, apresia PN ratifika ona konvensaun direitu ba Ema ho Defisiénsia (EhD) ne’e labele sai hanesan retorikamente de’it maibé tenke implementa.
Notísia Relevante: PN ratifika konvensaun direitu ba Ema ho Defisiénsia
“Dahuluk ha’u hato’o ha’u-nia apresiasaun ba PN ne’ebé mak ratifika ona konvensaun direitu ba Ema ho Defisiénsia (EhD). Maibé ami hosi AHDMTL no ha’u pesoál hanesan ema ho defisiénsia hakarak ratifika ne’e labele retorikamente maibé tenke prátika no tau iha implementasaun, mak tenke tau orsamentu sensivél ba EhD,” nia dehan ba Agência TATOLI iha nia knaar fatin, Manleuana, Dili, tersa ne’e.
Gabriel de Sousa kontinua husu Governu atu tau osan sensivél ba EhD no tenke tau ba prátika no implementa, labele sai de’it hanesan dokumentu hodi rai diak iha gavera laran.
“Ho ida-ne’e ami nafatin halo advokásia, monitorizasaun hodi fó hanoin ba Governu para tau prátika no implementa. Tanba pontu balun ne’ebé sira baibain dehan prátika edukasaun inkluzivu no implementa kada eskritórriu públiku hotu-hotu tenke iha asesibilidade. Ida-ne’e ami nafatin halo monitorizasaun,” nia rekomenda.
Entretantu Diretór Diresaun Nasionál Promosaun Direitu Ema ho Defesiénsia (DNPDEP), Mateus da SIlva, hateten bainhira rona Parlamentu Nasionál (PN) aprova ona Konvensaun Ratifikasaun Direitu ba Ema ho Defisiénsia sira, MSSI kontente tanba bele ratifika ona konvensaun refere.
“MSSI sente kontente tanba PN bele aprova ona Konvensaun Ratifikasaun Direitu ba Ema ho Defisiénsia sira-ne’ebé mak ita luta lubuk boot, to’o tinan barak mak foin aprova,” nia dehan.
Deputadu sira iha PN hotu-hotu sensivél ba iha ratifiksaun konvensaun katak sira iha konsiénsia katak asuntu defisiente ne’e, la’ós de’it ba maluk EhD sira maibé ba ema sira-ne’ebé mak la’ós defisiénsia loron ruma sei kahor malu ho defisiénsia sira, tanba imposivél EhD mai fali ema ne’ebé mak la’ós defisiénsia ne’e.
Tanba ne’e, nia dehan, bainhira PN aprova ona mak sai hanesan orientasaun internasionál ida katak ba ministériu sira hotu tenke tau ona orsamentu nune’e fó atensaun ba EhD iha Timor-Leste.
“Entaun futuru, MSSI liuhosi DNPDED mak kontinua servisu ho liña ministeriál sira hodi implementa Planu Asaun Anual (PAN), maibé molok implementa ita sei haruka ezbosu ka dekretu-lei ida ba estabelesimentu Konsellu Nasionál ne’e ba parte superiór sira depois mak submete ba Konsellu Ministru atu hetan apresiasaun no aprova hodi ida-ne’e mak ita bele implementa,” nia dehan.
Jornalista : Osória Marques
Editór : Cancio Ximenes
