AMC forma ekipa sensibiliza lei ijiene no órden públika ba komunidade
COVALIMA, 05 jullu 2022 (TATOLI)–Administrasaun Munisípiu Covalima (AMC) forma ekipa atu halo sensibilizasaun ba Dekretu-Lei númeru 33/2008 koalia kona-ba ijiene no órden públika ba komunidade sira iha munisípiu Covalima tanba durante lei refere seidauk implementa ho didi’ak.
Notísia Relevante: Dekretu-lei 33/2008 kona-ba Ijiene no Órden Públika seidauk aplika
“Ita hala’o enkontru atu forma ekipa no aprezenta kalendáriu atu realiza sensibilizasaun lei ijeine no órden públika ba komunidade,” Administradór munisípiu Covalima, Francisco de Andrade, hateten ba jornalista sira iha salaun AMC, Kampung Baru, tersa ne’e.
Razaun realiza enkontru ne’e, tanba haree ba dezenvolvimentu iha munisípiu Covalima la’o ho di’ak kompara ho munisípiu seluk, maibé ema balun iha munisípiu no iha postu laiha konsiénsia ho nune’e estrada protokolu sira nakonu ho animal.
Dekretu lei númeru 33/2008 ko’alia kona-ba ijiene no orden públika ne’ebé iha ona maibé iha munisípiu Covalima seidauk implementa ho sériu.
“Ita haree munisípiu Covalima haree ba dezenvolvimentu la’o di’ak kompara ho munisípiu seluk. Oras ne’e dadauk ita-nia ema balun iha munisípiu no postu administrativu sira laiha konsiénsia hodi dor lixu nune’e iha estrada sira nakonu ho lixu no ho animal,” nia dehan.
Tanba, nia dehan, Governu fui alkatraun gasta osan ne’ebé boot maibé sidadaun sira haki’ak animal ne’e husik iha estrada sira hanesan iha suku Suai Loro, suku Debos, aldeia Ahi-Narai no parte Salele postu administrativu Tilomar, komunidade sira kesi karau iha estrada.
Maske lei iha ona maibé durante ne’e lei ijiene no órden públika implementa ladún ho sériu, tanba ne’e autoridade deside realiza enkontru hodi implementa lei refere ho rigor, tenke forma ekipa forte envolve liña ministériu hotu hodi halo sensibilizasaun atu fó tempu ba komunidade.
Tuir kalendáriu, iha sábadu (2/7) tun halo sensibilizasaun no tersa (12/8) halo operasaun ba animál sira-ne’ebé komunidade kesi iha estrada, tanba animál labele estraga Governu fui alkatraun gasta osan ne’ebé boot no ameasa ema-nia vida.
Ho nune’e hafoin ekipa halo sensibizaun sei aplika lei ne’e ho rigór bainhira komunidade kontinua kesi animál iha estrada sira.
Iha enkontru ne’e, partisipa hosi administradór munisípiu Covalima, administradór postu administrativu no diretór munisipál iha munisípiu Covalima.
Jornalista : Celestina Teles
Editór : Cancio Ximenes
