Bankada Fretilin husu Governu investe setór produtivu

DILI, 05 jullu 2022 (TATOLI)—Xefe Bankada Fretilin iha Parlamentu Nasionál, David Dias Ximenes ‘Mandati’, husu Governu atu investe iha setór produtivu rai-laran hodi fó reseita sustentável.
Notísia Relevante: Governu realiza jornada orsamentál hodi konkretiza medida Lei GOP 2023
“Hotu-hotu ko’alia ita-nia petróleu sei hotu ka maran iha tinan balun tan. Se ita preokupa duni situasaun sira hanesan ne’e, entaun tempu ona atu buka alternativa saida de’it mak bele hetan hodi okupa fali petróleu nia fatin. Ha’u husu Governu atu investe iha setór produtivu lai-laran hodi fó reseita sustetável” Xefe Bankada Fretilin ne’e hato’o liu hosi intervensaun polítika iha plenária Parlamentu Nasionál, tersa ne’e.
Nia hateten, daudaun Timor-Leste iha dívida boot no ko’alia kona-ba poupansa maibé despeza mós barak hela.
“Kuantu mais ita ko’alia poupansa ita-nia fundu petróleu ne’ebé ita despeza dala ruma sa’e bara-barak ba beibeik loos. Tan ne’e, ita labele halo buat hotu dependente de’it ba petróleu, bele karik ita tenke buka alternativa seluk atu prezerva ita-nia fundu petrólíferu ida-ne’e,” nia hateten.
Deputadu hosi bankada Governu ne’e sujere, alternativu mak tenke investe no dezenvolve ona iha setór produtivu hanesan agrikultura no turizmu iha rai-laran hodi garante nia sustentabilidade.
“Primeiru alternativa mak tenke dezenvolve agrikultura ba ema sosa produtu sira-ne’e no ida seluk mak dezenvolve setór turizmu, nune’e ema mai ita-nia rain hodi lori osan mai atu taka fali osan ne’ebé gasta liu tiha ona. Se lae, oinsá ita la dezenvolve setór agrikultura mak ema tama barak hosi rai-li’ur domina iha Komérsiu,” nia hateten.
Tuir nia, ida-ne’e akontese tanba Timor-Leste laiha soberania produtiva maibé depende loos importasaun hosi rai-li’ur.
“Ohin loron, ita hotu nia obrigasaun atu buka forma oinsá bele dezenvolve ita-nia agrikultura, turizmu parte ida mós hodi rezolve problema dezempregu,” nia dehan.
Hatán ba ida-ne’e, Ministru ba Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, hateten ko’alia kona-ba agrikultura iha prioridade Grande Opsaun Planu (GOP) tau ona saida mak Governu hakarak prioritiza hodi hahú fó prioridade ba agrikultura, atu investe liután atu nune’e hasa’e produsaun makaas no importasaun bele redús.
Nune’e mós, nia dehan, dekretu-lei ne’ebé mak Governu hasai atu obriga ministéiru hotu bainhira halo prosesu aprovizionemtu kompra materiál lokál mak prioridade ho porsentu 75 tenke hola.
“Agora kabe ba produsaun sufisiente ka lae, ne’e depende atu nune’e motiva halo investimentu nafatin no produsaun bele sai mós alternativa prodús hare ba futuru tanba mina-rai mós sei maran ka hotu,” nia dehan.
Jornalista : Nelson de Sousa
Editór : Cancio Ximenes

