Bankada KHUNTO husu Governu kria subsídiu transporte ba auditór Kámara Konta
DILI, 05 jullu 2022 (TATOLI)—Vise Bankada KHUNTO iha Parlamentu Nasionál, Deputadu António Verdiál de Sousa, husu Governu kria subsídiu mensál ba transporte ba auditór iha Tribunál Kámara Konta.
Vise Bankada ne’e hateten, haree ba dekretu -lei númeru 20/2014, 6 agostu, ne’ebé aprova estatutu karreira rejime espesiál ba auditór Kámara Konta Tribunál Superiór Administrativu no Fiskál Konta iha artigu 14 versíkulu 1, ne’ebé regula auditór sira-nian renumerasaun ka saláriu ne’ebé determina kedas katak auditór sira-nia saláriu ne’e aumenta mós ho ajuda kustu tuir termu estatutu funsaun públika ninian.
“Bazea ba norma iha artigu 14, hosi rejime auditór sira-nian ne’e, auditór xefe no auditór sira balun hetan atribuisaun transporte Estadu nian, viatura no motorizada hodi fasilita viajen ba servisu fatin no fila ba uma,” Vise Bankada KHUNTO ne’e hateten liu hosi intervensaun polítika iha plenária Parlamentu Nasionál, tersa ne’e.
Maibé dekretu-lei númeru 21/2021, 10 novembru, tama iha vigor hó ninian implementasaun, auditór sira-ne’e hetan notifikasaun hosi servisu fatin hodi fó fila transporte hirak ne’e ba Estadu ka Tribunál.
“Ladún kmanek auditór sira la hetan benefísiu hosi dekretu-lei ne’e ka la hetan subsídiu mensál ba transporte ninian,” nia dehan.
Bankada KHUNTO nia akompañamentu katak, Governu aprova dekretu lei númeru 21/2021, 10 novembru, ne’ebé kria subsídiu mensál transporte ba funsionáriu públiku ne’ebé goja rejime jerál ka estatutu funsaun públika nian.
Iha dekretu-lei refere la mensiona ka la atribui direitu kona-ba subsídiu mensál transporte ba funsionáriu públika hirak seluk ne’ebé goja rejime espesiál sira.
“Saida mak deskreve iha alínea “k” artigu 49 Estatutu Funsaun Públika Lei númeru 8/2004 katak Beneficiar de Abonos e Ajudas de Custo nos termos da Lei, ida-ne’e fó hanoin mai ita katak, funsionáriu públiku ka servidór Estadu, ne’ebé goja jerál no rejime espesiál no inklui mós ajente administrasaun públika hotu iha direitu ne’ebé hanesan,” nia hateten.
Bankada KHUNTO nia observasaun katak, funsionáriu sira hotu tantu sira goja rejime jerál nune’e mós hirak ne’ebé goja rejime espesiál inklui mós hirak seluk hanesan ajente administrasaun públika iha direitu ne’ebé hanesan ka hotu-hotu sai benefisiáriu ba abonu saida de’it no ajuda kustu ba transporte halo tuir termu lei nian.
Tanba, nia hateten, funsionáriu hirak ne’e hotu-hotu utiliza transporte hodi ba servisu fatin, nune’e mós fila ba ida-idak nian uma, la’ós de’it funsionáriu sira goja rejime jerál mak utiliza transporte.
António Verdial hateten, ho razaun sira-ne’e husu Primeiru-Ministru (PM) ho kolaborasaun hosi órgaun kompetente sira seluk, nune’e tau matan fila-fali ba dekretu-lei númeru 21/2021, 10 novembru.
“Ho nia karáter urjente ka kria dekretu-lei seluk kona-ba subsídiu mensál transporte ba funsionáriu públiku hirak seluk ne’ebé goja rejime espesiál, nune’e sira mós bele hetan direitu ne’ebe hanesan ho funsionáriu públiku sira-ne’ebé goja rejime jerál, espesiálliu ba auditór sira ne’ebé fundamenta iha sira-nia estatutu rasik,” nia husu.
Governu presiza tau atensaun tanba auditór sira-nia funsaun ne’ebé ezerse atu deteta naksala iha aktu administrativa no finanseira fiskalizasaun legál ba atividade finanseira Estadu Timor-Leste ho objetivu promove boa-governasaun, nune’e bele lori risku oioin inklui inseguransa ba sira-nia vida tomak.
“Tanba ne’e, husu Governu kria no hadi’a kondisaun oinsá sira bele hetan subsídiu mensál ba transporte, hanesan atualmente Governu atribui ba funsionáriu públiku hirak goja rejime funsaun públika nian,” nia dehan.
Hatán ba preokupasaun ne’e, Governu liuhosi Ministru ba Asuntu Parlamentár no Komunikasaun Sosiál (MAPKOMS), Francisco Martins Pereira Jerónimo, hateten loos duni iha rejime jerál no espesiál ne’ebé ko’alia kona-ba halibur fila-fali ka dada karreta Estadu ho polítika oinsá estasiona iha fatin de’it presiza mak uza no ema ida-idak labele atribui individual, maibé karreta sira halibur iha fatin ida iha ministéiru rasik bainhira uza halo rekezisaun atu hala’o servisu.
“Ida-ne’e polítika ida atu halo poupansa uitoan hodi salvaguarda karreta sira, maibé ami rejista hela preokupasaun hosi bankada KHUNTO nian ne’e bele informa ba Primeiru-Ministru ho parte kompetente atu haree. Kona-ba rejime espesiál goja relgalias lubuk ida-ne’ebé mak dalaruma rejime jerál la hetan, nune’e ita presiza hatene tanba nia goja regalias dalaruma liu tan ho rejime jerál,” nia hateten.
Jornalista : Nelson de Sousa
Editór : Cancio Ximenes
