HEADLINE, MUNISÍPIU, OÉ-CUSSE (RAEOA), SOSIEDADE SIVĺL

CVTL kapsita ema na’in-23 iha RAEOA kona-bá protesaun direitu labarik

CVTL kapsita ema na’in-23 iha RAEOA kona-bá protesaun direitu labarik

OÉ-CUSSE, 05 jullu 2022 (TATOLI) – Kruz Vermella Timor-Leste (CVTL, sigla portugés), tersa ne’e realiza formasaun ba ekipa voluntáriu sira hamutuk na’in-23 iha Rejiaun Administrativa Espesiál Oé-Cusse Ambeno (RAEOA) kona-bá protesaun direitu devér ba labarik sira.

Koordenadór CVTL Filiál Oé-Cusse, Domingos Tapen Kune, hatete, CVTL hetan apoia fundu hosi Kruz Vermella Austrália liuhosi CVTL nasionál hodi realiza formasaun hanesan mós informasaun ba voluntáriu sira hamutuk na’in-23 iha filiál Oé-Cusse.

Objetivu hosi formasaun ne’e atubele kompriende di’akliu-tán kona-bá importánsia oinsá fó protesaun ba labarik sira, bainhira implementa kna’ar serbisu iha baze. Nune’e mós liuhosi formasaun ne’e, atu halo selesaun ba membru na’in-rua atu reprezenta CVTL filiál RAEOA hodi partisipa formasaun iha nível nasionál hodi prepara rekursu ba filiál Oé-Cusse.

Eduardo dos Santos Gonçalves, nu’udar formadór hosi CVTL nasionál, informa formasaun ne’e kontinuasaun tanba iha 2021 realiza ona iha CVTL filiál lima hanesan, Ermera, Liquiçá, Dili, Aileu, nune’e iha tinan ne’e kontinua realiza fali iha Same, Covalima, Vikeke, Baukau, Lautem, Bobonaro, Ainaro no ikusliu iha RAEOA.

“Primeira faze hosi formasaun ne’e, sei prepara voluntáriu sira, ita haree hosi rezultadu formasaun ita sei identifika ema na’in-rua kada filiál sira, atu reprezenta munisípiu ba tuir tán formasaun iha nasionál, hodi mai implementa iha filiál idak-idak, atu fasilita lori matéria kona-bá protesaun labarik ba sosiedade sira kona-bá direitu devér labarik nian,” nia katak.

Luiza Baba, nu’udar voluntáriu orgullu tanba liuhosi formasaun ne’e bele aumenta koñesimentu kona-bá kna’ar oinsá proteje direitu no devér labarik nian iha terrenu.

“Ha’u orgullu no kontente tebes tanba matéria ne’ebé ohin ami simu ona hosi formadór sira, bele aumenta ami-nia koñesimentu atu bainhira tún iha baze, ita bele kompriende di’akliu tán kna’ar idak-idak nian, oinsá proteje direitu labarik nian,” nia orgullu.

Jornalista   : Abílio Elo Nini
Editór         : Evaristo Soares Martins

iklan
iklan

Leave a Reply

iklan
error: Content is protected !!