DILI, INKLUZAUN SOSIÁL

DNPDED fó formasaun ba estudante termolojia bolu Ema ho Defisiénsia

DNPDED fó formasaun ba estudante termolojia bolu Ema ho Defisiénsia

Diretór Nasionál Protesaun no Promosaun Ba Direto Ema ho Defisénsia, MSSI, Mateus da Silva. Imajen Tatoli/Francisco Sony

DILI, 05 jullu 2022 (TATOLI)—Diretór Dirasaun Nasionál Promosaun Direitu Ema ho Defisiénsia (DNPDED), Mateus da Silva, hateten DNPDED kontinua fó formasaun ba estudante kona-ba termolojia oinsá bolu Ema ho Defisiénsia (EhD) iha sosiedade.

“Hahú ohin ba oin, ita fó hanoin ba ita-nia komunidade liu-liu estudante sira atu hadi’a termolojia bolu ema ho defisiénsia, nune’e ema ho defisiénsia labele sente deskrimina iha sosiedade. Tanba ne’e, ami-nia dirasaun kontinua fó formasaun ba estudante sira iha eskola sira, liu-liu estudante iha munisípiu,” Diretór Dirasaun Nasionál Promosaun Direitu Ema ho Defisiénsia (DNPDED) iha Minsitériu Solidariedade Sosiál no Inkluzaun ne’e hateten ba Agência Tatoli, iha nia knar fatin Caicoli, Dili, tersa ne’e.

Tanba, tuir nia, estudante presiza aprende no komprende termolojia ba ema ho defisiénsia sira-nian nune’e bele esplika fali ba inan-aman ka komunidade einjerál.

“Nune’e ita husu ba estudante sira atu dignifika ema ho defisiénsia hanesan sidadaun ida ho ita iha sosiedade ida-nia leet,” nia dehan.

Tanba iha era dijitaliazasaun ba asesu teknolojia informasaun no komunikasaun, EhD sira iha Timor-Leste tenke enfrenta mós dezafiu sira hanesan saldo ba teknolojia ka ense pulsa hafoin asesu internete no auto empregu ne’ebé menus ba ema ho defisiénsia iha mundu online nian.

“Tanba ne’e sai problema ida Ema ho Defisiénsia sira bainhira asesu ba teknolojia informasaun no komunikasaun,” nia dehan.

Ida-ne’e bele motiva sidadaun hotu hodi mós iha konsiénsia kona-ba kondisaun ema ho defisiensia sira no fiar katak ida-ne’e bele utiliza atu fornese asesu informasaun ba ema defisiente sira.

“Ho desenvolvimentu teknolojia ne’ebé la’o lalais iha nível globál, hein katak ita la taka matan hodi bele tau atensaun ba ema ho defisiensia sira atu bele hetan sira-nia direitu ba asesu informasaun liuhosi teknolojia dijitál,” nia hateten.

Diretór ne’e relata Ema ho Defisiénsia iha Timor-Leste hamutuk 38,118 no maiória sei moris izoladu hela.

Maibé ida-ne’e la’ós sasukat ida ba MSSI maibé oinsá mak servisu hamutuk ho ministériu hotu-hotu atu bele apoiu no suporta EhD sira hodi bele kore an hosi diskriminasaun no tenke hamriik hamutuk iha oin.

“Mundu agora ita la haree ba ema ne’e defisiénsia ka lae, maibé ita haree ba dezenvolvimentu ida-ne’ebé ema hotu-hotu goza, laiha diskriminasaun no importante mak buka dalan atu EhD mós asesu másimu iha edukasaun,” nia hateten.

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!