NASIONÁL, HEADLINE, KAPITÁL

Ema deskoñesidu estraga uma 20 iha Afalokai Viqueque

Ema deskoñesidu estraga uma 20 iha Afalokai Viqueque

Xefe suku Afalokai, Constantino Guterres. Imajen Tatoli/Vitorino Lopes da Costa

DILI, 05 jullu 2022 (TATOLI)—Ema deskoñesidu estraga uma 20 no konsege sunu ida, iha segunda kalan (04/06), maizumenus tuku 23:28, iha aldeia Uaikai, suku Afaloikai, postu Administrativu Uatulari.

“Ema mai tama kalan ho motorizada, ema taka metin oin ne’ebé ami la koñese ema ruma. Nune’e, ema tuda rahun komunidade nia uma iha aldeia Uaikai hamutuk 20 no uma ida konsege sunu, maibé Polísia sira konsege salva,” Xefe suku Afalokai, Constantino Guterres, informa ba Agência Tatoli, via telefónika.

Notísia relevante: Sunu uma tolu iha Ritabou, PNTL identifika ema na’in-haat

Nia dehan, daudaun autoridade hamutuk polísia sira halo identifikasaun ba uma sira ne’ebé maka hetan estragu.

“Situasaun agora la’o normál, ami autoridade no komunidade hamutuk ho Polísia Nasionál Timor-Leste (PNTL) hodi rekolla evidénsia iha fatin akontesimentu,” nia akresenta.

Antes ne’e, iha domingu kalan (03/07), komunidade sira ses-an hosi uma no horikalan ema deskoñesidu tama hodi estraga komunidade sira-nia uma.

“Iha domingu kalan, avo ida mate iha aldeia Uaikai no bainhira hakoi tiha, iha domingu kalan ne’e família hosi avo nian hadeer hela ai-funan. Hafoin komunidade hosi suku seluk mai iha estrada hodi dansa no kanta, iha kedan hadeer ai-funan nia uma oin. Entaun família hosi matebian avo nia ba ko’alia, maibé ema la rona, ne’ebé família sira dehan ema ne’e lanu hosik ba. Ikus mai ema ne’e halo tan asaun seluk, tuda ema-nia uma sira. Ho ida-ne’e família sira iha bairru laran la satifaz, entaun halo barullu tiha,” nia konta tuir.

Aleinde ne’e, sira ne’ebé halo barullu pasa informasaun ba nia maun-alin dehan ema ta’a kanek, entaun nia família mai hosi Uaikai fila maka mai fali halo asaun tuda komunidade nia uma.

“Entaun komunidade Uaikai hirus ema sira ne’ebé mai hosi suku seluk ne’e. Hafoin liu minutu balun de’it, sira organiza malu mai tan ho asaun ida preparadu hakarak oho malu, to’o tuda malu maka hosi suku seluk ne’e na’in-ida hetan kanek grave. Akontesimentu liu tiha maka horikalan (segunda) akontese estraga komunidade nia uma,” nia tenik.

Iha akontesimentu domingu kalan, komunidade sira ses-an hosi sira-nia uma, nune’e horikalan ema tama tuda rahun komunidade sira-nia uma.

“Horikalan kedan ami komunika kedas Komadante Eskuadra PNTL hodi to’o iha fatin akontesimentu, maibé la kaer ema ruma,” autoridade lokál ne’e haktuir.

Akontesimentu iha domingu kalan ne’e envolve suspeitu na’in-hitu, kompostu hosi suspeitu hosi suku Afaliokai lima no suku Matahoi rua, ne’ebé daudaun detein iha sela Eskuadra postu Uatulari.

Maski nune’e, Autoridade suku husu ona PNTL Viqueque inklui Forsa sira atu fó seguransa ba suku Afalokai.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!