DILI, 05 jullu 2022 (TATOLI)–Ministru Koordenadór Asuntu Ekonómiku (MKAE), Joaquim Amaral, hateten, Governu tau ona planu atu halo revizaun ba saláriu mínimu.
“Tau ona iha Planu Grande Opsaun. Parlamentu aprova tiha ona, ne’ebé Governu serbisu atu konkretiza planu ne’ebé iha ona. Ami serbisu hela iha kalendáriu ida-ne’e,” Ministru informa hafoin relata serbisu ba Primeiru-Ministru, Taur Matan Ruak, iha Palásiu Governu, tersa ne’e.
Tuir Ministru, Governu iha vontade rezolve saláriu mínimu, tanba ne’e iha ona iha planu.
“Ami konsidera halo mudansa ba saláriu mínimu ne’e prioridade. Bainhira tau ona iha planu tenki serbisu tuir kaledáriu ne’ebé iha no tau ona iha planu signifika sai ona hanesan lei hodi kesi ita hotu, tanba ne’e mka husu pasiénsia oituan, ami sei kumpre planu ne’e bainhira aprova ona,” nia akresenta.
Notísia relevante: KSTL husu Governu hasa’e saláriu mínimu ba traballadór
Maski nune’e, bainhira molok to’o aprovasaun, parte relevante hotu sei fó input no númeru ne’ebé tau hosi konsultasaun ida, karik tempu ne’e presiza atualiza mak sei iha biban atu ko’alia ba malu atu haree oinsá bele atualiza dadus ne’ebé iha.
“Governu tau ona iha planu, tanba ne’e maka husu ita hotu nia kontribuisaun katak Governu bainhira tau ona ita sei rezolve saláriu mínimu durante mandatu,” nia kompromete.
Antes ne’e, esbosu lei saláriu mínimu liu ona diskusaun naruk Komisaun Nasionál Servisu (KNS), ne’ebé kompostu hosi Konfederasaun Sindikatu Timor-Leste (KSTL), Sekretáriu Estadu Formasaun Profisionál no Empregu (SEFOPE) no Kámara Komérsiu no Indústria Timor-Leste (CCI-TL, sigla portugés), molok submete ba MKAE.
Iha loron 28 maiu 2012, KNS ne’ebé prezide hosi SEFOPE aprova saláriu mínimu $115, ne’ebé antes ne’e halo peskiza no ikus mai aplika ba Funsaun Públika no setór privadu.
Desizaun KNT tama iha vigór iha loron tuirmai hosi Lei Traballu númeru 4/2012 loron 21 fevereiru no sei hetan revizaun hafoin liu tinan-rua, maibé to’o agora la akontese, nune’e saláriu mínimu seidauk halo revizaun durante tinan-10.
Saláriu mínimu estabelese dahuluk ho montante $85, hafoin halo revizaun iha tinan 2012 no fixa ho $115.
Jornalista : Antónia Gusmão
Editora : Julia Chatarina
