Janeiru-juñu: DTT Covalima kontribui reseita $25,900.00 ba kofre Estadu
COVALIMA, 05 jullu 2022 (TATOLI)–Diretór Transporte Terrestre Covalima, Joaquim Gusmão, informa hahú fulan-janeiru to’o fulan-juñu tinan ne’e Dirasaun Transporte Terrestre Covalima konstribui ona reseita $25,900.00 ba kofre Estadu.
“Hahú janeiru to’o juñu tinan ne’e, Dirasaun Transporte Terrestre (DTT) Covalima kontribui ona reseita hamutuk $25,900.00 ba kofre Estadu ne’ebé mak hosi inspesaun kareeta no motor, lisensa trajetu, renova karta kondusaun no halo rejistu,” Joaquim Gusmão hateten ba Agência Tatoli, iha salaun administrasaun Covalima, Kampung Baru, tersa ne’e.
DTT Covalima kontribui reseita ne’e hosi fulan-janeiru to’o juñu kontribui reseita $25,900.00 ne’ebé iha fulan-janeiru kontribui $7,390.00, fevereiru $4,850.00, marsu $3,715.00, abríl $2,830.00 fulan-maiu kontribui $3,010.00 no fulan-juñu $4,105.00.
Reseita sira-ne’e DTT kontribui liuhosi halo inspesaun kaereta no motor hamutuk 1822 hodi kontribui reseita $18,970.00, lisensa trajetu hamutuk 75 hodi kontribui reseita $1,555.00 renova karta kondusaun hamutuk 167 hodi kontribui reseita $3,110.00, rejistu motor no karreta hamutuk 206 ne’ebé kontribui reseita $2,265.00 ne’ebé totál invoice hamutuk 2270 hodi kontribui reseita $ 25,900.00.
Tanba ne’e, nia apela ba motorista sira-ne’ebé sira-nia dokumentu mate tenke trata dokumentu iha dirasaun transporte terrestre, nune’e motorista sira bele livre halo movimentu bainhira polísia tranzitu sira halo pasa revista.
Jornalista : Celestina Teles
Editór : Cancio Ximenes
