KFP atualiza situasaun funsaun públika ba Xefe Estadu
DILI, 05 jullu 2022 (TATOLI)—Prezidente Komisaun Funsaun Públika (KFP), Faustino Cardoso, ho nia ekipa, tersa ne’e, hala’o enkontru ho Xefe Estadu, José Ramos Horta, hodi atualiza situasaun funsaun públika iha Timor-Leste.
“Ohin, Komisaun Funsaun Públika (KFP), ami komisáriu na’in-lima mai halo audiénsia ho Prezidente Repúblika tanba durante ne’e Xefe Estadu husu dala hira kedas atu oinsá nia bele hetan informasaun atualizasaun kona-ba situasaun funsaun públika iha Timor-Leste Leste,” Prezidente KFP, Faustino Cardoso, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
KFP atualiza kona-ba númeru funsionáriu públiku daudaun ne’e atinje ona rihun 35-resin kompostu hosi funsionáriu permanente rihun 27-resin no ajente administrasaun públika ne’ebé númeru sa’e ba beibeik.
“Se ita aumenta tan ho sira kazuál ho tan sira seluk besik rihun 40-resin ona. Se konta tan ho sira seluk hanesan PNTL, F-FDTL ne’e rihun 53-resin ona ne’e ita bele imajina ita-nia funsaun públika ne’e boot ba beibeik,” nia dehan.
Nune’e mós, KFP atualiza ba Xefe Estadu kona-ba jestaun rekrutamentu, promosaun, kargu dirasaun, prosesu dixiplinár ninian no oinsá liga ho irregularidade, formasaun no reforma, no situasaun sira seluk ne’ebé durante ne’e Prezidente Repúblika (PR) rejista hela atu hetan esplikasaun hosi parte KFP.
Iha sorumutu ne’e, PR partilla mós ho preokupasaun tendensia funsaun públika ne’e boot ba beibeik nune’e PR enkoraja atu KFP servisu ho imparsiál, neutralidade hadook an hosi tentasaun monu iha partidarizasaun funsaun públika.
PR mós enkoraja atu KFP servisu hamutuk ho entidade tomak inklui mós ekipa tékniku sira hosi Prezidensia Repúblika hodi haree lisuk ba kestaun funsionalizmu funsaun públika.
Xefe Estadu hato’o katak, Timor-Leste presiza iha reforma ida atu oinsá mak hamenus dependénsia ba iha mina-rai, tanba bainhira funsionalizmu funsaun públika ne’e boot ba beibeik sei tau ba risku sustentabilidade finanseira Estadu, nune’e presiza envolvimentu setór privadu nian makaas liután nu’udar fatin ida atu ema buka servisu la nesesária tenke ba iha funsaun públika.
Jornalista : Nelson de Sousa
Editór : Cancio Ximenes
