COVALIMA, 05 jullu 2022 (TATOLI)–-Prezidente Komisaun Reguladór Arte-Marsiál (KRAM), Octávio da Conceição, hateten hafoin grupu artemarsiál tolu iha lisensa atu halo atikividade, KRAM halo diseminasaun matadalan lima ba reabertura prátika ba grupu arte marsiál-arte rituál iha munisípiu Covalima.
Notísia Relevante: KRAM Covalima orgullu grupu arte marsiál hatudu atrasaun anima komunidade
“Hafoin KRAM rejistu organizasaun tolu hanesan PSHT, IKS no KORKA no reabertura ba sira-nia sentru treinamentu no atividade arte marisiál sira-ne’e, ita hanoin atu asegura sira-nia atividade presiza matadalan ne’ebé hatuur responsablidade organizasaun arte marsiál. Tanba ne’e KRAM hamosu segunda diretiva, KRAM derivadu hosi lei númeru 5/2017, kompeténsia propria komisaun reguladora arte marisiál,” Prezidente KRAM ne’e hateten ba jornalista sira, iha salaun Uma Feto, Santa Rosa, tersa ne’e.
Tanba segunda diretiva KRAM ne’e atu introdus servisu sira ne’ebé mak lideransa organizasaun arte marsiál sira hala’o hahú la’o tuir prosedimentu diretiva.
Ho nune’e, iha segunda diretiva komisaun reguladora arte marsiál hatuur matadalan lima hanesan matadalan kona-ba sensu resensiamentu tanba Governu liu-liu KRAM atu hatene membru organizasaun arte marsiál feto no mane iha postu administrativu no to’o aldeia.
Matadalan daruak kona-ba prosedimentu ba fatin treinamentu sira hanesan fatin sira-ne’ebé atu prátika arte marsiál hodi bele hatene estatutu rai privadu ka estadu no mós presiza iha mapeamentu ne’ebé fiksu.
Matadalan datoluk kona-ba, prosedimentu sertifikadu ba treinadór sira tenke iha sertifikadu, bainhira laiha sertifikadu labele treinu ba membru sira no tenke introdús ho hanoin sira iha kapasidade.
Atu sai treinadór tenke domina pontu sira hanesan vida espiritualidade, valór importante hosi organizasaun, edukasaun sivíka sidadania, jinástika, arte kombate no tenke intelijente.
Matadalan dahaat mak prosesu dixiplinár inkomplementu, sé mak sei aplika sansaun bainhira membru sira komete krime, treinadór organizasaun sira sei aplika uluk hafoin KRAM fó sansaun, tuir segundu diretiva fó sai inkomplementu no inflasaun sei fó xamada atensaun, aplika koima no halo suspensaun atividade totál.
Matadalan dalimak kona-ba konsellu dixiplinár sira atu kontrola atitude membru sira oinsá mak sira bele terrenu, uza farda, respeita lidér sira, autoridade lokál no komunidade.
Reprezentante Komandante PNTL Munisípiu Covalima, Natalia Cardoso, husu ba grupu arte marsiál no arte rituál tenke hatudu dixiplina no respeitu bainhira hala’o atividade iha fatin ne’ebé de’it.
“Ita tenke tau liafuan dixiplina iha ita-nia hanoin bainhira hala’o atividade iha fatin ne’ebé de’it no tenke kumpre dekretu-lei ne’ebe Governu aprova ba grupu arte marsiál sira,” nia dehan.
Iha serimonia ne’e partisipa hosi reprezentante administradór munisipiu Covalima no postu administrativu sira, reprezentante komadante PNTL munisipiu Covalima no organizasaun arte marsiál no arte rituál iha munisipiu Covalima.
Antes ne’e, iha loron 19 fulan-fevereiru tinan 2020 Governu liuhosi reuniaun konsellu Ministru aprova proposta rezolusaun Governu ne’ebé aprezenta hosi Primeiru-Ministru, Taur Matan Ruak, ba revogasaun rezolusaun Governu númeru 16/2013, 10 jullu, ne’ebé bandu GAM halo atividade.
Ho nune’e, iha loron 30 fulan abríl 2022, grupu arte marsiál no arte rituál hala’o asaun dame iha nivél munisípiu sira hahú ona kria amizade entre grupu arte marsiál no arte rituál iha munisípiu Covalima.
Jornalista : Celestina Teles
Editór : Cancio Ximenes
