DILI, 05 jullu 2022 (TATOLI)–VIII Governu Konstitusionál liuhosi Ministériu Ensinu Superior Siénsia no Kultura (MEJD), daudaun ne’e halo ona komunikasaun ho Banku Mundiál hodi diskute prosesu empréstimu atu aselera prosesu konstrusaun sidade universitáriu Aileu.
Ministru Ensinu Superiór Siénsia no Kultura (MESSK), Longuinhos dos Santos, hateten, daudaun ne’e iha ona faze diskusaun, maibé Banku Mundiál husu hela dokumentu kona-ba dezeña sidade universitáriu Aileu no rezultadu hosi estudu viabilidade inklui prosesu detalladu enjeñaria nian.
“Ita seidauk fó dokumentu sira ne’e tanba daudaun ne’e sei iha hela faze diskusaun, tanba ne’e ita seidauk bele informa totál orsamentu ka fundu hira maka ita presiza hosi Banku Mundiál,” Ministru informa hafoin enkontru ho Primeiru-Ministru (PM), Taur Matan Ruak, iha Palásiu Governu, tersa ne’e.
Notísia relevante: MESSK prepara indemniza abitante afetadu sidade universitáriu Aileu
Maski MESSK no Banku Mundiál hahú ona diskusaun, maibé kona-ba prosesu preparasaun projetu sidade Universitáriu Aileu sei realiza iha jullu tinan ida-ne’e, nune’e bele finaliza ona preparasaun morru, hafoin sei aprezenta ba Ministériu Obra Públiku (MOP) no Ajénsia Dezenvolvimentu Nasionál (ADN), atu nune’e tama ba setembru bele loke ona konkursu públiku.
Aleinde ne’e, iha enkontru ne’e, Ministru relata asuntu haat ba Primeiru-Ministru, relasiona ho serbisu sira ne’ebé maka trasa ona.
“Ha’u mai hasoru Primeiru-Ministru ne’e tanba simu konvite. Tanba ne’e, ha’u aprezenta asuntu haat kona-ba progresu sidade universitáriu Aileu, asuntu kualidade no jestaun ba Instituisaun Ensinu Superiór Públiku no Privadu, utilizasaun lian iha Instituisaun Ensinu Superiór sira no ikus liu ha’u informa kona-ba ensinu distánsia,” nia tenik.
Biban ne’e, PM husu ba Ministru Longuinhos atu buka implementa asuntu haat ne’e ho responsabilidade, liu-liu kona-ba andamentu ba prosesu sidade universidade Aileu, atu nune’e bele buka estratejia di’ak kona-ba kualidade no jestaun institusionál iha Instituisaun Ensinu Superiór Públiku no Privadu sira.
Jornalista : Tomé Amado
Editora : Julia Chatarina
