DILI, 05 jullu 2022 (TATOLI)—Prezidente Repúblika (PR), José Ramos Horta, preokupa ho situasaun profesór sira-ne’ebé durante ne’e hanorin tinan barak ona iha eskola públiku sira maibé nafatin kontinua ho estatutu kontratadu no voluntáriu de’it no laiha kontratu.
Notísia Relevante: MEJD sei rekruta profesór kontratadu 900-resin iha 2021
“Kestaun profesór voluntáriu atu esplika ba imi katak ohin Xefe Estadu tau atensaun boot ba profesór sira, hanorin tinan barak maibé nafatin sai kontratadu. Tanba Xefe Estadu dehan nasaun ida atu sai avansadu tenke tau aas papél profesór sira-nian,” Prezidente Komisaun Funsaun Públika (KFP), Faustino Cardoso, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, tersa ne’e.
Nia hateten, preokupasaun kona-ba profesór voluntáriu no kontratadu hanorin to’o ona tinan 10 seidauk hetan estatutu permanente, ida-ne’e kabe ba Ministériu Edukasaun Juventude no Desportu (MEJD) haree situasaun ida-ne’e la’ós kompeténsia KFP nian.
Tanba, nia esplika, KFP nia papel mak atu oinsá fiskaliza no akompaña legalidade prosesu, se buat hotu la’o tuir prosesu legál KFP sempre servisu hamutuk.
“Ne’ebé dala ida tan, ida-ne’e kompeténsia Ministériu Edukasaun Juventude no Desportu (MEJD) nian,” nia dehan.
KFP atualiza mós ba PR katak, to’o ohin loron profesór barak mak hetan transferénsia hodi ba asume kargu xefia iha ministériu sira hanesan iha administrasaun estatál sai administradór postu, administradór munisipál no Prezidente Autoridade.
Xefe Estadu partilla preokupasaun estatutu profesor sira-nian tanba bele implika ba direitu joven sira-nian lakon profesor atu bele kontinua dezempeña.
Notísia Relevante: KFP atualiza situasaun funsaun públika ba Xefe Estadu
Jornalista : Nelson de Sousa
Editór : Cancio Ximenes
