Aban, Governu lansa pagamentu $50 ba idozu-invalidéz iha Liquiça
DILI, 06 jullu 2022 (TATOLI)—VIII Governu Konstititusionál liuhosi Institutu Nasionál Seguransa Sosiál (INSS), kuarta (07/07) aban, hahú lansa pagamentu $50 ba idozu no inavalidéz sira iha territóriu nasionál.
Notísia Relevante: 2022, INSS selu subsídiu apoiu idozu no invalidéz millaun $62
Prezidente Institutu Nasionál Seguransa Sosiál (INSS), Longuinhos Armando Leite, informa pagamentu ne’e hala’o simultaneamente maibé tuir planu Governu sei halo lansamentu ba programa ne’e iha munisípiu Liquiça.
“Mezmu ita selu silmultanea ba ita-nia idozu no invalidéz iha territóriu nasionál maibé pagamentu iha tinan ne’e ita tenke halo lansamentu pagamentu dahuluk iha Liquiça, tanba hahú selu ho osan $50 kada fulan ba sira,” Longuinos Leite hateten ba Agência Tatoli liuhosi telefónika, kuarta ne’e.
Lansamentu ne’e hala’o tanba uluk Governu selu ho $30 kada fulan no tinan ne’e sa’e ba $50, entaun presiza lansa nune’e ema hotu hatene katak pagamentu ba idozu no invalidéz ne’e aumenta ona ba $50 kada fulan.
“Sa’e ona ba $50 entaun ita presiza osan hamutuk $61,864,800 (millaun $62) hodi selu ba ita-nia idozu no invalidéz iha faze dahuluk tinan 2022 nian,” nia hateten.
Lista idozu no invalidéz ba tinan 2022, liu-liu ba faze dahuluk nian ne’e ho benefisiáriu hamutuk 103.108 mak sei simu subsídiu, hodi kompara ho tinan kotuk ne’e benefisiáriu hamutuk na’in 93.378 ho fundu hamutuk $17,172.040.
“Signifika ita-nia benefisiáriu iha ne’e aumenta ba 9,730 mak sei simu subsídiu iha loron aban,” nia dehan.
Tuir nia, iha 09 dezembru 2021, deputadu sira iha Parlamentu Nasionál (PN) aprova proposta-lei númeru 147 hodi aumenta pensaun ba $50 kada fulan kompara ho antes ne’e idozu no invalidéz kada fulan simu de’it $30.
Tanba dekretu-lei Númeru 19/2008, 19 juñu, artigu 20 hateten subsídiu apoiu idozu no invalidéz iha tinan 2022 ne’e montante $50 kada fulan, ho nune’e tinan ne’e osan aumenta ba millaun $62.
Husu kona-ba lista reklamasaun benefisiáriu faze daruak 2021 nian, nia hatán, INSS seidauk simu relatóriu rezultadu pagamentu hosi Banku Nasionál Komérsiu Timor-Leste (BNCTL).
Notísia Relevante: PN aprova subsídiu ba idozu hasa’e ba $50
Jornalista : Osória Marques
Editór : Cancio Ximenes
