ADTL husu Governu aselera estatutu Konsellu Nasionál direitu ba EhD
DILI, 06 jullu 2022 (TATOLI)—Diretór Ezekutivu Asosiasaun Defisiénsia Timor-Leste (ADTL), Cesário da Silva, husu Governu atu aselera estatutu Konsellu Nasionál ba direitu ba Ema ho Defisiénsia (EhD) iha Timor-Leste.
Notísia Relevante: PN ratifika konvensaun direitu ba Ema ho Defisiénsia
“Ami husu Governu liuhosi Ministériu Solidariedade Sosiál no Inkluzaun (MSSI), atu aselera diskusaun estatutu Konsellu Nasionál ho liña ministériu sira ho objetivu hodi aprezenta rápida iha reuniaun Konsellu Ministru (KM),” nia dehan iha Parlamentu Nasionál, Dili.
Nia iha esperansa katak Governu sei forma ekipa Konsellu Nasionál ida hodi hatán ba nesesidade no direitu ba ema ho defisiénsia sira, maibé ba futuru mak tenke halo alokasaun rekursu Orsamentu Jerál Estadu (OJE) atu bele asegura implementasaun sira hosi Planu Asaun Nasionál (PAN) 2021-2030 no hatán ba nesesidade ema ho defisiénsia sira-nian.
Vise Ministra Solidariedade Sosiál no Inkluzaun (MSSI), Signi Chandrawati Verdiál, hateten parte ministéiru nia servisu hanesan koordenadór jerál ba área ema ho defisiensia ne’ebé iha asuntu transversál lubuk ida asegura asesibilidade ema ho defisiénsia no parte ida kumpre mós ba konvensaun ne’e.
“Asuntu transversál lubuk ida asegura asesibilidade ema ho defisiénsia ba edukasaun inkluzivu. Ne’ebé, planu asaun nasionál ba ema ho defisiensia 2021-2030 aprova ona no servisu hahú hosi 2021 to’o mai ohin loron, ita iha embaixadór kada liña ministéiru hamutuk 13. Sira hirak ne’e mak sai pontu fokál ba asuntu ema ho defisiénsia ne’ebé liña ministériu sira hotu nomea sira-nia ema maiória iha kargu diretór nasionál no jerál hodi haree ba asuntu transversál ida-ne’e,” nia hateten.
Vise Ministra ne’e informa, iha ona ezbosu atu kria konsellu nasionál ba ema ho defisiénsia bainhira Timor-Leste tama ratifikasaun konsellu ne’e mak hodi nomea ema hodi hala’o servisu.
“Entaun ezbosu ne’e iha ona. Ami diskute ona konsellu ho ami-nia maluk defisiénsia sira hola parte depois ezbosu ne’e finaliza submete ba Konsellu Ministru halo aprovasaun mak ita bele nomea ekipa hodi halo servisu tékniku no ratifikasaun monitorizasaun, depois konvensaun ne’e,” nia dehan.
Jornalista : Osória Marques
Editór : Cancio Ximenes
