iklan

NASIONÁL, POLÍTIKA

AMD sei fó xamada atensaun ba ofisina ne’ebé fakar óleu arbiru

AMD sei fó xamada atensaun ba ofisina ne’ebé fakar óleu arbiru

Prezidente Aautoridade Munisípiu Dili, Guilhermina Ribeiro. Imajen Tatoli/Antonio Dasiparu

DILI, 06 jullu 2022 (TATOLI)—Prezidente Autoridade Munisipiu (PAM) Dili, Guilhermina Filomena Saldanha Ribeiro, hateten Autoridade Munisípiu Dili (AMD) sei fó xamada atensaun ba ofisina ne’ebé halo óleu fakar iha estrada públiku tanba fó impaktu ba saúde.

“Ami identifika ona fatin haat ka lima sira mós hato’o ona mai, ida-ne’e hein ami sei halo karta dala ida (fó xamada atensaun). Se lae, orsida ida mai halo, ida seluk mós mai halo, entaun ne’e han tempu. Maibé, ida-ne’e la’ós de’it ba iha ofisina sira maibé ba mós warung balun. Tanba, warung balun hahan restu no fase bikan fakar arbiru,” Guilhermina Filomena Saldanha Ribeiro, hateten ba Ajénsia Tatoli, iha nia knar fatin, Díli. 

Hanesan, nia dehan, iha parte tasi ibun ne’ebá kalan loron sai hela nune’e no balun mós to’o sira-nia bee foer ba loos iha Embaixada sira-nia oin. Ida-ne’e buat ida la di’ak no sai mós preokupasaun, entaun ida-ne’ebé fó lisensa ba komérsiu fila-liman no ambiente mós presiza haree.

“Hanesan uma na’in ami presiza foti informasaun, foti foto, husu oinsá sira atúa ida-ne’e,” nia dehan.

Guilhermina Filomena Saldanha Ribeiro ne’e informa, Autoridade Munisípiu Dili identifika fatin haat ka lima iha área Metinaro no Díli laran.

“Maibé Metinaro ladún, iha Dili laran mak barak liu. Hanesan iha Don Aleixo, Cristo Rei iha ida no rua no balun iha duni ita-nia área marjinál. Ami identifika ona depois ami husu ita-nia lisensa komérsiu iha no kompleta ka lae, lisensa ne’e mate ona ka sei moris. Bazea ba ida-ne’e mak ami haree maibé iha mós balun, nia husu lisensa ba ida ne’e, maibé nia halo fali atividade seluk,” nia dehan.

Maibé preokupasaun AMD nia mak AMD identifika, depois hato’o ba parte relevante hodi haree situasaun ida-ne’e, tanba autoridade mós iha servisu Munisipál Agúa Saneamentu no Ambiente.

“Saneamentu no Ambiente mós la’o hamutuk, maibé tanba kompeténsia delegasaun ami só bele fó avizu de’it, katak labele so’e fo’er hanesan ne’e no labele halo hanesan ne’e. Maibé atu fó sansaun hanesan multa, ida-ne’e sira hosi Komérsiu no Ambiente mak lolos bele fó,” nia dehan.

Tuir nia, ofisina sira-ne’ebé halo óleu fakar iha estrada públiku, ida ne’e iha situasaun rua mak hanesan komunidade sira kuandu atu loke sira-nia atividade ekonomika ida Ministériu Turizmu no Komérsiu Indústria (MTCI) no Sekretáriu Estadu Ambiente (SEA) tenke fó lisensa.

“Hanesan uma na’in, ami mós bele haree, maibé ambiente mós tenke haree, tanba bainhira sira so’e óleu arbiru nia impaktu mós iha. Ida-ne’e impaktu halo fo’er ambiente no ida mós impaktu hosi buat seluk ne’ebé bele akontese iha ne’ebá. Ne’ebé, ha’u hanoin saida mak sira (Deputada) foti relevante, maibé bele dehan aleinde Autoridade Munisípiu Dili, situasaun ida-ne’ebé fó lisensa tuir lolos tenke prevee buat sira-ne’e. Kuandu akontese sira so’e fo’er arbiru, tenke fó sansaun ba buat ruma ne’ebé tuir lisensa lolos ne’e sira fó,” nia dehan.

Infelizmente, nia dehan, AMD la hetan kompeténsia delegasaun entaun sei susar uitoan, mezmu iha dekretu-lei númeru 33/2016 ko’alia. Maibé iha ne’ebá hateten katak tenke iha akordu interorgániku, entre Ministériu ho Estatál atu fó kompeténsia ba AMD, tanba iha buat barak AMD haree katak balun fó.

“Entaun, ami só bele halo koordenasaun, aproximasaun maibé atu dehan saida mak ita fó sansaun, ezemplu ba ofisina sira. Entaun, lolos sira ne’ebé mak fó lisensa komérsiu iha ne’ebá haree mós asuntu ambientál, entaun Ambiente tenke tun hodi bele haree sansaun saida mak tenke fó ba sira,” nia dehan.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!