DILI, 06 jullu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova ona projetu proposta lei, ne’ebé aprezenta hosi Ministru Prezidénsia Konsellu Ministru, Fidelis Manuel Leite Magalhães, ba autorizasaun lejizlativa kona-ba determinasaun limite idade ba relasaun serbisu funsionáriu públiku no ajente administrativu sira.
“Governu hakarak ho projetu proposta lei, katak Parlamentu Nasionál fó autorizasaun hodi fiksa limite idade hanesan kauza atu remata kontratu serbisu iha Administrasaun Públika. Bainhira atinje limite idade, funsionáriu públiku no ajente administrativu sira sei bele reforma no husu ninia pensaun velise,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu ne’e, iha Palásiu Governu.
Notísia relevante: KPF hato’o proposta funsionáriu públiku idade 60 tenke reforma
Governante ne’e esklarese, tuir Konstituisaun Repúblika Demokrátiku Timor-Leste (KRDTL) ba matéria hirak ne’e, Governu sei presiza hetan autorizasaun hosi Parlamentu molok Governu avansa ho inisiativa rasik liuhosi forma dekretu-lei. Tanba ne’e maka konsellu ministru diskute no deside governu sei hato’o proposta autorizasaun ida ne’e ba parlamentu nasionál.
“Ninia objetivu maka halo obrigatóriu reforma ba funsionáriu sira ne’ebé tama ona idade 60, ida-ne’e atu loke dalan sira ne’ebé mak iha ona sistema laran atu kontinua ba leten no mós bele fó espasu ba foin-sa’e sira bele tama, maibé ita mós konsidera katak iha preokupasaun balun tanba ona idade reforma, maibé sira ninia instituisaun sei presiza, iha kazu ida-ne’e sira sei tama nafatin reforma maibé ministériu ida-idak bele halo justifikasaun atubele hatama sira ba iha kontratu la’ós ona funsionáriu públiku, ne’ebé maka ho durasaun renovável kada tinan másima tinan-lima,” nia esplika.
Enkuantu, proposta ida bainhira aban-bainrua pasa, sei aplika ba rejime hotu iha Administrasaun Públika nian, rejime espesiál sira mós sei sujeita ba idade reforma obrigatóriu iha tinan 60.
Jornalista : Antónia Gusmão
Editora : Julia Chatarina
