iklan

EDUKASAUN, HEADLINE

MEJD promete sei aprezenta rekrutamentu profesór voluntáriu ba KM

MEJD promete sei aprezenta rekrutamentu profesór voluntáriu ba KM

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 06 jullu 2022 (TATOLI)–Ministru Edukasaun Juventude no Desportu (MEJD), Armindo Maia, promete ba deputadu sira iha Parlamentu Nasionál (PN) katak iha jullu nia laran sei aprezenta prosesu rekrutamentu profesór voluntáriu 2.000 iha reuniaun Konsellu Ministru (KM).

“Ha’u promete ba deputadu sira iha Parlamentu Nasionál, horisehik iha jullu nia laran ha’u sei aprezenta prosesu rekrutamentu profesór sira-nia ba Konsellu Ministru atu hetan desizaun, bainhira liu fulan-ida ne’e maka laiha rezultadu, maka deputadu sira bele husu klarifikasaun,” Ministru hateten iha Palásiu Governu, kuarta ne’e.

Notísia relevante: Deputadu bankada CNRT husu MEJD rezolve prosesu rekrutamentu profesór 2.000

Tuir governante ne’e, fulan-jullu sei iha loron-25 ne’ebé sei iha posibilidade ministériu atu aselera prosesu ne’e hodi garante katak ministériu iha duni kompromisu hakarak aselera prosesu rekrutamentu ne’e ba oin.

Ministériu iha ona estimasaun orsamentu ba planu rekrutamentu profesór voluntáriu, maibé ida-ne’e sei konfidensiál tanba presiza akompaña mós prosesu balun ne’ebé la’o hela iha Ministériu Finansa.

“Ita seidauk bele fó sai totál orsamentu hira mak prevee tanba seidauk aprezenta ba Konsellu Ministru no aprova maka ba Parlamentu Nasionál la aprova mós sai konfuzaun ba ita. Tanba ne’e, husik lai prosesu la’o tiha kuandu finaliza ona iha Parlamentu Nasionál mak Ministériu sei anunsia dala-ida kona-ba orsamentu hirak maka prevee ba prosesu rekrutamentu profesór voluntáriu 2.000 ne’e,” nia tenik.

Jornalista    : Tomé Amado

Editora        : Julia Chatarina

iklan
iklan

One Comment

  1. Oinsá ho profesór sira-ne’ebé tinan sanulu resin ona hela nafatin de’it ho estatutu hanesan kontratadu? Tuir ha’u-nia hanoin, rejime voluntáriu ne’e tenke halakon ona tanba agora lisensiadu iha área edukasaun nian ne’e barak loos. Ba fali sira voluntáriu ne’e barak maka mai ho diploma sekundáriu nian de’it no aat liután maka sira ne’e manán saláriu hanesan de’it ho ema ne’ebé lisensiadu iha área edukasaun.

Leave a Reply

iklan
error: Content is protected !!