iklan

EDUKASAUN, HEADLINE

MESSK hein PR promulga dekretu-lei regula Institutu Ensinu Superiór

MESSK hein PR promulga dekretu-lei regula Institutu Ensinu Superiór

Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 06 jullu 2022 (TATOLI)–Ministériu Ensinu Superiór Siénsia no Kultura (MESSK) seidauk hetan kompeténsia atu regula Instituisaun Ensinu Superiór (IES) ne’ebé la kumpre rekizitu tanba sei hein Prezidente Repúblika promulga dekretu-lei ne’ebé atu garante kualidade prosesu ensinu aprendizajen sira.

“Ita sei bazeia hela ba dekretu-lei ne’ebé maka aprova ona iha Konsellu Ministru, maibé seidauk hetan promulgasaun hosi Prezidente Repúblika, bainhira loos ona, lei ne’e sei fó kompeténsia tomak ba Governu liuhosi MESSK atu kontrola ba Instituisaun Ensinu Superiór privadu no públiku sira ninia atividade atu garantia kualidade,” Ministru Ensinu Superiór Siénsia no Kultura, Longuinhos dos Santos, iha Palásiu Governu, kuarta ne’e.

Notísia relevante: UNPAZ sei kompleta rekezitu atu hetan lisensa operasionál ba klase paralela

Maski Governu seidauk iha kompeténsia atu fó sansaun ba instituisaun ne’ebé la kumpre rekizitu, maibé MESSK konsege hapara ona atividade klase paralela no kampus regular balun ne’ebé estabelese iha munisípiu sira, hanesan klase paralela UNPAZ iha Oé-cusse tanba la kumpre rekizitu no fasilidade adekuadu atu garante kualidade ensinu aprendizajen ba estudante sira hanesan mós iha kampus sentrál.

“Ita dehan hapara ne’e katak sira la kumpre duni lisensa operasionál, ne’ebé laós de’it UNPAZ nian maka ita hapara maibé iha mós klase paralela sira seluk ne’ebé loke iha munisípiu sira kuandu la kumpre rekizitu mós ita hapara,” nia akresenta.

Kona-ba klase paralela UNPAZ iha Oé-cusse, Governu haruka hapara provizóriu tanba atu garante kualidade estudante sira, tanba iha relatóriu ne’ebé ekipa ministériu aprezenta, hatudu duni katak klase paralela UNPAZ Oé-cusse la prenxe rekizitu inklui lisensa operasionál.

“Ministériu konsidera klase paralela ka kampus regulár sira hanesan ne’e sei labele garante kualidade ensinu aprendizajen ba estudante sira, tanba Instituisaun Ensinu Superiór ida atu loke ninia klase ka ramu iha munisípiu ida, ninia dezenvolvimentu mós tenke hanesan ho kampus sentrál, nune’e estudante sira bele hola parte iha atividade klase paralela ka kampus ramu ne’e no hetan benefísiu iha futuru,” nia tenik.

Tuir Ministru, IES ne’ebé maka la kumpre desizaun bazeia ba dekretu-lei, sira sei kona sansaun hodi selu multa, ne’ebé sei hein mós dekretu-lei.

Jornalista   : Tomé Amado

Editora       : Julia Chatarina

iklan
iklan

Leave a Reply

iklan
error: Content is protected !!