DILI, 06 jullu 2022 (TATOLI)—Ministériu Petróleu no Minerál (MPM) seidauk halo lansamentu ba subsídiu kombustível ba benefisiáriu sira tanba sei hein atualizasaun dadus hosi Ministériu Transporte no Telekomunikasaun (MTK) no Ministériu Agrikultura no Pesa (MAP).
Ministériu Petróleu no Minerál, Víctor da Conceição, hateten, kona-ba programa ne’e rasik iha ona transferénsia verba ba MTK no MAP maibé to’o agora seidauk hatene rezultadu.
Notísia relevante: Transporte rodoviáriu públiku 3.871 sei sai benefisiáriu subsídiu kombustível
“Kona-ba lansamentu ne’e, ami-nia parte halo hotu ona enkontru ho operadór kombustível sira ne’e no deside ona atu ezekuta maibé seidauk tanba dadus hosi MTK no MAP, ne’ebé ita sei hein atualizasaun dadus hosi ministériu rua ne’e mak foin bele halo lansamentu,” Víctor da Conceição, hateten, iha Palásiu Governu, kuarta ne’e.
Antes ne’e, MTK prepara ona lista transporte rodaviáriu públiku hamutuk 3.871 áreu rua no marítima rua atu hetan subsídiu kombustível.
Nune’e mós, MAP liuhosi Diresaun Nasionál Peska mós identifika no prepara ona lista benefisiáriu hamutuk 685 atu hetan subsídiu kombustível hosi Governu.
Notísia relevante: Operadór atividade agríkola no peska 686 sai benefisiáriu subsídiu kombustível
Kestaun ne’e, relasiona ho dekretu-lei númeru 18/2022 kona-ba atribuisaun subsídiu kombustível ba operadór transporte rodoviáriu públiku, transporte aéreu no marrítima nasionál, inklui adkirente kombustível destinadu ba atividade agríkola no piskatória, ne’ebé tempu badak Governu sei implementa.
Governu liuhosi reuniaun Konsellu Ministru iha loron 13 abril 2022 aprova dekretu-lei númeru 18/2022 loron 19 abril no promulga ona hosi Prezidente Repúblika iha loron 19 abril 2022, ne’ebé estabelese subsídiu kombustível.
Nune’e, atu garante estabilidade presu kombustível iha merkadu nasionál hodi evita impaktu negativu ekonomia ba konsumidór, maka lejizlativa ne’e fó biban ba Governu halo intervensaun merkadu kombustível liuhosi atribuisaun subsídiu ba operadór transporte sira.
Subsídiu ne’e sei realiza liuhosi vale deskontu (voucher) ida atu uza iha estasaun sira ne’ebé maka fa’an kombustível ho ninia montante ne’ebé korrespondente ba 100% hosi valór diferensa entre folin médiu gazolina ka gazóleu litru ida, iha dezembru 2021, folin gazolina ka gazóleu litru ida iha data fó sai voucher kombustível nian, ho konsiderasaun ba tipu kombustível nian no ninia karakterístika sira.
Jornalista : Arminda Fonseca
Editora : Julia Chatarina
